30 سے زائد لینگوئجز میں 5000 سے زائد اسلامی کتب کا خزانہ آن لائن پڑھیں اور ڈاؤن لوڈ کریں
Irshadat e Imam Zain ul Abideen | ارشادات امام زین العابدین رحمۃ اللہ علیہ
Pehlay Ilm Haasil Karne Walay Ka Maqam
ارشادات امام زین العابدین رحمۃ اللہ علیہ
اَلْحَمْدُ لِلہِ رَبِّ الْعٰلَمِیْنَ وَالصَّـلٰوةُ وَالسَّـلَامُ عَلٰی سَیِّدِالْمُرْسَـلِیْن ط
اَمَّا بَعْدُ فَاَعُوْذُ بِاللہِ مِنَ الشَّیْطٰنِ الرَّجِیْم ط بِسْمِ اللہِ الرَّحْمٰنِ الرَّحِیْم ط
ارشاداتِ امام زین العابدین
دعائے عطار: یارَبَّ المصطفٰے!جوکوئی 14 صفحات کا رسالہ ’’ ارشاداتِ امام زین العابدین ‘‘پڑھ یا سُن لے، اُسےصحابہ واہلِ بیت کے ارشادات پر عمل کرنے اور اسے عام کرنے کی توفیق عطافرمااوراُسےبےحساب بخش دے۔ اٰمین بِجاہِ خاتَمِ النَّبِیّیْن صلّی اللہُ علیهِ واٰلہٖ وسلّم
دُرُود شریف کی فضیلت
فرمانِ امام زین العابدین رحمۃُ اللہِ علیہ : رسولِ پاک صلی اللہ علیہ واٰلہٖ وسلم پر کثرت سے درود پڑھنا اہلِ سنّت کی علامت ہے ۔ (القول البدیع، ص 131، حدیث: 5)
مجھے تم مَسلکِ احمدرضا پر استقامت دو بنوں خدمت گزارِ اہلِ سنّت یا رسول اللہ
(وسائلِ بخشش، ص 334)
صَلُّوا عَلَی الْحَبِیب! صَلَّی اللهُ علٰی مُحَمَّد
پہلے علم حاصل کرنے والے کا مقام
جس نے تم سے پہلے کوئی علم حاصل کر لیا تو وہ اُس معاملےمیں تمہارا رہنما ہے چاہے وہ عمر میں تم سے چھوٹا ہی کیوں نہ ہو۔(احیا ء العلوم ،1/197 )
علما انبیا کے وارث
دنیا میں لوگوں کے سردار سخی ہیں ، جبکہ آخرت میں دین والے اور علم و فضل والے ہوں گے کیونکہ علما ئے کرام انبیا کے وارث ہیں ۔ (تاریخ ابن عساکر، 41/ 385)
بڑے مرتبے والا کون؟
عرض کیا گیا: لوگوں میں سب سے بڑے مرتبے والا کون ہے ؟ فرمایا: جس کے نزدیک دنیا کی کوئی حیثیت نہ ہو ۔(التذکرۃ الحمدونیہ،1/112،رقم:222)
دنیا اور آخرت
دنیا نیند(یعنی غفلت کی جگہ) جبکہ آخرت بیداری ( کا مقام) ہےاور ہم ان کے درمیان خوابِ پریشان کی طرح ہیں۔(ربیع الابرار،1/37،رقم:47)
حقیقی زاہد کون؟
حضرت علی بن حسین (یعنی امام زین العابدین )رحمۃُ اللہِ علیہ سے زاہد(یعنی دنیا سے بے رغبت شخص) کی صفت کے بارے میں پوچھا گیاتوآپ نے فرمایا: جو زادِ راہ کے بغیر(منزل تک) پہنچے ، اپنی موت کے دن کی تیاری رکھے اور (آخرت کے شوق میں) اپنی زندگی سے اُکتا جائے۔ (المنتخب من کتاب الزہد والرقائق ، ص83 ، رقم:44)
اچھائیوں اور برائیوں کا آئینہ
غوروفکر ایک ایسا آئینہ ہے جو مؤمن کو اس کی اچھائیاں اور برائیاں دکھاتا ہے۔
(تاریخ ابن عساکر، 41/408)
اُس شخص پر تعجب ہے!
مجھے اُس اِترانے والے مُتَکَبِّر شخص پر تعجب ہے جو کل تک صرف (ناپاک)پانی کا قطرہ تھا اور کچھ عرصے بعد (قبر میں) سڑی ہوئی لاش بن جائے گا، اور مجھے ایسے شخص پر بھی بہت تعجب ہے ، جو اللہ پاک کے (وجود کے )بارے میں شک کر تا ہے حالانکہ وہ اپنے پیدا کیے جانے کو دیکھ رہا ہے (جو پیداکرنےوالے کے وجود کی روشن دلیل ہے )۔ اور مجھے ایسے شخص پر بھی حیرانی ہے جو قیامت کے دن دوبارہ زندہ کیے جانے کا انکار کرتا ہے حالانکہ وہ پہلی مرتبہ پیدا کیے جانے کو دیکھ رہاہے ( کیونکہ جو رب پہلی مرتبہ پیدا کر سکتا ہے ، وہ دوبارہ بھی زندہ کرسکتا ہے ) اور مجھے ایسے شخص پر بھی تعجب ہے جو فنا ہونے والی دنیا کے لیے تو کام کر تا ہے لیکن ہمیشہ رہنے والے گھر (آخرت) کو چھوڑے رکھتا ہے۔( اور صاحبِ روح البیان شیخ اسماعیل حقی رحمۃ اللہ علیہ نے یہ اضافہ کیا ہے:)
عقلمند پر لازم ہے کہ وہ ان کاموں سے عبرت حاصل کرے ، اس سے پہلے کہ موت اس کے سر پر آجا ئے اُسے چاہیے کہ اللہ پاک کو یادر کھتے ہوئے حق کے راستے میں صبح و شام کوشش کرے اور موت سے پہلے اس کی تیاری کر رکھے کیونکہ وقت ہوا کی تیزی کی طرح گزر رہا ہے۔ وہ لوگ کہاں ہیں! جو نبیوں اوررسولوں کا انکار کر تے اور اُنہیں جھٹلاتے رہے، خدا کی قسم !وہ مرچکےاور عنقریب یہ ساری کائنات ختم ہونے والی ہے ، پس اس کائنات میں فرشتے ، جنات اور انسانوں میں سے کوئی باقی نہیں بچے گا، اعمال نامے لپیٹ دیے جائیں گے اور قیامت قائم ہو گی ،اس میں ہر چھوٹابڑاعمل ظاہر ہو جائے گا، ہائے افسوس! بد بختوں کی رسوائی اور آفریں ! نیک لوگوں کی سعادت مندی۔ اے ہمارے ربّ ! ہم تجھ سے موت کی یاد ، نیکیوں پر استقامت اور ظاہری و باطنی طور پر سیدھے راستے پرچلتے رہنے کا سوال کرتے ہیں ، اے قوی(یعنی طاقت والے)! اے معین (یعنی مدد فرمانے والے)!ہم کمزوروں کی مدد فرما، آمین۔(تفسیر روح البیان،پ 8، الاعراف،تحت الآیۃ:8 ،3/136)
شریر بدن
بیشک بدن جب بیمار نہ ہو ، تو شریر ہو جاتا ہے اور شریر بدن سے خیر کی توقع نہیں رہتی۔ (سیر اعلام النبلاء،5/338)
بغیر علم کسی کے بارے میں بات نہ کی جائے
کوئی شخص کسی دوسرے کے بارے میں بھلائی کی کوئی ایسی بات نہ کہے جو اُ سے خود معلوم نہ ہو کیونکہ پھر قریب ہے کہ وہ اُس کے بارے میں بُرائی کی کوئی ایسی بات بھی کہہ دے گا جو اسے معلوم ہی نہ ہو۔ اورجب تم میں سے دولوگ اللہ پاک کی نافرمانی پر دوستی اختیار کرتے ہیں تووہ دونوں اللہ پاک کی نافرمانی پر ہی جُد اہوتے ہیں ۔
(تہذیب الکمال،20/398)
حقیقی بھائی چارہ
آپ نے ایک شخص سے دریافت کیا: کیا تم اپنے (دینی ) بھائی کی جیب سے ہاتھ ڈا ل کر اُس کی اجازت کے بغیر بھی اپنی مرضی سے کوئی چیز نکال سکتے ہو ؟ اس نے جواب دیا: نہیں ۔ تو آپ نے فرمایا: (اگر ایسا ہے ) تو تم دونوں میں (ابھی تک حقیقی)بھائی چارہ نہیں۔
(قوت القلوب ،2/374 )
دوستی اور دشمنی میں احتیاط
کسی بھی شخص سے ہر گز دشمنی نہ رکھو اگر چہ تمہارا خیال ہو کہ وہ تمہیں کوئی نقصان نہیں پہنچا ئے گا اور کسی کے تحفہ کو ہر گز گھٹیا نہ جانو اگر چہ تمہارے خیال میں وہ تمہیں کوئی نفع نہیں دے گا کیونکہ تم نہیں جانتے کہ کب تمہیں اپنے دوست کی ضرورت پڑ جائے اور تم نہیں جانتے کہ کب اپنے دشمن سے ڈرناپڑے اور جب کوئی تمہارے پاس عذر(معافی مانگنے کا کوئی سبب) لے کر آئے تو اس کا عذر قبول کرو اگر چہ تم جانتے ہو کہ وہ شخص جھوٹا ہے۔
(التذکرۃ الحمدونیۃ،4/357،رقم:901)
تقسیمِ الٰہی پر رضامندی ہی حقیقت میں ”غِنیٰ“ ہے جو اپنے لیے اللہ پاک کی تقسیم پر راضی رہا تو وہ لو گوں میں سب سے زیادہ غنی ہے ۔ (حلیۃ الاولیاء، 3/159،رقم: 3543)
تقدیر پر راضی رہئے !
تقدیر کے ناپسندیدہ اُمور (یعنی سختیوں) پر راضی رہنا، یقین کے اعلیٰ درجات میں سے ہے۔ (عیون الاخبار ، 2/403)
سختیوں پر صبر کرو !
اے میرے بیٹے ! سختیوں پر صبر کرو کسی کے حقوق ضائع نہ کرو اور اپنے بھائی کو ایسے کام میں نہ ڈالوجس کا نقصان تمہارے لیے اس کے (عارضی ) نفع سے زیادہ ہو۔
(تاریخ ابن عساکر ، 41/408)
دلوں میں محبت ڈالنے کا ذریعہ
بیشک اُس نے تمہیں اپنی محبّت کا قیدی بنالیا جس نے تمہارا اِحسان ماننے میں پہل کی۔
(تاریخ ابن عساکر ، 41/409)
سخی کون ہے ؟
سخی وہ نہیں جو مانگنے والوں کو دیتا ہے بلکہ سخی وہ ہے جو اللہ پاک کے فرمانبرداروں کے حقوق کی ادائیگی میں پہل کرتا ہےاور اپنی تعریف کا خواہشمند نہیں ہوتا بشرطیکہ وہ بارگاہِ خداوندی سے کامِل ثواب کا یقین رکھے۔ (احیاء العلوم، 3/304)
کتاب کا موضوع
کتاب کا موضوع
- دوستی اور دشمنی میں احتیاط
- دُرُود شریف کی فضیلت
- سخی کون ہے ؟
- دلوں میں محبت ڈالنے کا ذریعہ
- سختیوں پر صبر کرو !
- تقدیر پر راضی رہئے !
- حقیقی بھائی چارہ
- بغیر علم کسی کے بارے میں بات نہ کی جائے
- شریر بدن
- اُس شخص پر تعجب ہے!
- اچھائیوں اور برائیوں کا آئینہ
- حقیقی زاہد کون؟
- دنیا اور آخرت
- بڑے مرتبے والا کون؟
- علما انبیا کے وارث
- پہلے علم حاصل کرنے والے کا مقام
- گفتگو کا فن اور خرابیوں سے حفاظت
- سب سے بڑی غربت
- موت کا انکار نہیں
- کسی کو کسی پر برتری نہیں
- غصّے کا نقصان
- غیبت سے بچنے کا اجر
- رمضان میں غفلت میں رہنے والوں پر تعجب!
- قیامت میں پُر سکون آنکھیں
- مہمان نوازی اعلیٰ اخلاق کی نشانی ہے
- سخی اور کنجوس میں فرق
- عقل مند کے لیے اشارہ کافی ہے
- دینی نفع دینے والے کی صحبت اختیارکرو
- مجھےکثرتِ گریہ پر ملامت نہ کرو
- نرمی کی قدر
- ہمیں ہمارے مرتبے سے بلند نہ کرو
- سب سے زیادہ مال دار کون؟
- عبادت کے معاملے میں لوگوں کی اقسام
- امام زین العابدین کی دعا
- صبر کا بدلہ
- توبہ کرنے والے سے اللہ پاک کی محبت
- ”نیکی کی دعوت “کی اہمیت
- جنت کیسے مانگی جائے؟
- غضبِ الہی دور کرنے والا عمل
- شیخین کا مرتبہ امام زین العابدین کی زبانی
- اہلِ حق کو موت کی پروا نہیں
- امام زین العابدین کی منٰی میں دعا
- تضمین بر نظم منسوب بہ زین العابدین رضی اللہُ عنہ
