- Home
- Al Madina Library
- Namaz Parhne Kay Bawajood Gunnah Kiyon Hojatay Hain
- Namaz Buraiyon Se Rokti Hai
30 سے زائد لینگوئجز میں 5000 سے زائد اسلامی کتب کا خزانہ آن لائن پڑھیں اور ڈاؤن لوڈ کریں
Namaz Parhne Kay Bawajood Gunnah Kiyon Hojatay Hain | نماز پڑھنے کے باوُجود گناہ کیوں ہوجاتے ہیں؟
Namaz Buraiyon Se Rokti Hai
نماز پڑھنے کے باوُجود گناہ کیوں ہوجاتے ہیں؟
- Home
- Al Madina Library
- Namaz Parhne Kay Bawajood Gunnah Kiyon Hojatay Hain
- Namaz Buraiyon Se Rokti Hai
اَلْحَمْدُ لِلہِ رَبِّ الْعٰلَمِیْنَ وَالصَّـلٰوةُ وَالسَّـلَامُ عَلٰی سَیِّدِالْمُرْسَـلِیْن ط
اَمَّا بَعْدُ فَاَعُوْذُ بِاللہِ مِنَ الشَّیْطٰنِ الرَّجِیْم ط بِسْمِ اللہِ الرَّحْمٰنِ الرَّحِیْم ط
یہ مضمون ”فیضانِ نماز“صفحہ 39 تا 55 سے لیا گیا ہے ۔
نماز پڑھنے کے باوُجُود گُناہ کیوں ہو جاتے ہیں؟
دُعائے عطار:یارَبَّ المصطفےٰ ! جو کوئی 17 صفحات کا رسالہ ’’ نماز پڑھنے کے باوُجُود گناہ کیوں ہو جاتے ہیں ؟ ‘‘پڑھ یا سُن لےاُسے مُخلص نمازی بنا کر ہر گُناہ سے بچا اور اُسے جنّت الْفِرْدوس میں اپنے پیارے پیارے سب سےآخِری نبی صلی اللہ علیہ واٰلہٖ وسلم کا پڑوسی بنا۔
اٰمین بِجاہِ خاتَمِ النَّبِیّیْن صلّی اللہُ علیهِ واٰلهٖ وسلّم
دُرُود شریف کی فضیلت
فرمان آخِری نبی صلی اللہ علیہ واٰلہٖ وسلم : جس نے دن اور رات میں میری طرف شوق و مَحَبَّت کی وجہ سے تین تین مرتبہ دُرُودِ پاک پڑھا اللہ پاک پر حق ہے کہ وہ اُس کے اُس دن اور اُس رات کے گناہ بخش دے۔ (معجم کبیر، 18/362، حدیث: 928)
صَلُّوا عَلَی الْحَبِیب ! صَلَّی اللهُ علٰی مُحَمَّد
نماز بُرائیوں سے روکتی ہے
اللہ پا ک پارہ 21 سُوْرَۃُ الْعَنکَبُوت ، آیت45 میں ارشاد فرماتا ہے: ( اِنَّ الصَّلٰوةَ تَنْهٰى عَنِ الْفَحْشَآءِ وَ الْمُنْكَرِؕ ) ”ترجَمۂ کنزالایمان :بے شک نماز منع کرتی ہے بے حیائی اور بُری بات سے ۔“
نماز پڑھنے کے باوُجُود گناہ کیوں ہو جاتے ہیں ؟
پیارے پیارے اسلامی بھائیو! اللہ پاک کافرمانِ عا لی شان بِلا شک و شُبہ حق،حق ،حق ہے ۔ یقیناً ”نماز بے حیائی اور بری باتوں سے منع کرتی ہے۔“ لیکن کیا وجہ ہے کہ آج کل بے شمار نمازیوں کے اندر ماں باپ کی نافرمانی، بے پردگی، عُریانی، گالی گلوچ، غیبت، چُغلی، فُحْش گوئی، دل آزاری، لوگوں کی حق تَلَفی، سود و رِشوت کے لین دَین وغیرہ وغیرہ گناہوں کی کثرت ہے! کیا حقیقی نمازی جھوٹا، دَغا باز، چغل خور، رِزقِ حرام کمانے اور کھانے کھلانے والا، فلموں ڈراموں کا شیدائی، میوزیکل پروگراموں اور گانے باجوں کاشوقین نیز داڑھی مُنڈانے یا ایک مُٹھی سے گھٹانے والا ہوسکتا ہے؟ نہیں ……کبھی نہیں……ہرگز نہیں ۔ بے شک حقیقت یہی ہے کہ نماز بُرائیوں سے روکتی ہے۔افسوس! ہماری اپنی نمازوں میں کمزوریاں ہیں جن کے سبب ہم نیک نہیں بن پا رہے لہٰذا ہمیں چاہئے کہ ہم اپنی نماز کا جائزہ لیں ، نماز کے ظاہری و باطنی آداب سیکھیں اور اپنا وُضو و غسل وغیرہ بھی دُرُست کرلیں ۔ اگر صحیح معنوں میں باوُضو با طہارت خشوع و خضوع کے ساتھ اس کے تمام تَر ظاہری و باطنی آداب کو دھیان میں رکھ کر ہم نماز پڑھیں گے تو اِن شاءَ اللہ ضرور اس کی بَرَکتیں ظاہر ہوں گی اوردرست پڑھی جانے والی نماز کی بَرَکت سے واقعی گناہوں کی ظاہری و باطنی گندگیاں دُور ہوجائیں گی۔ اور ہم نیک صورت، نیک سِیرت مسلمان بن جائیں گے اور ہمارا پورا کردار سنتوں کا آئینہ دار بن جائے گا، اِن شاءَ اللہ ۔
صحیح نماز ہی بُرائیوں سے بچاتی ہے
جو اِسلامی بھائی اور اِسلامی بہنیں صحیح طریقے پرنماز ادا کرتے ہیں اللہ کریم اُنہیں ضرور برائیوں سے بچاتا ہے۔ چنانچِہ دو تابعی بزرگ حضرتِ حسن بصری اور حضرتِ قتادہ رحمۃُ اللہِ علیہما نے فرمایا کہ جس شخص کو اُس کی نماز برے کاموں اور فحش (یعنی بے حیائی کی ) باتوں سے باز نہ رکھے وہ نماز اُس کے لیے وَبال ہے البتہ جو شخص پانچوں وقت کی نماز اِس طرح ادا کرتا ہے کہ اُس کی شرائط و اَرْکان و اَحکام، سنّتیں اور دعائیں پورے طور پر بجالائے تو اللہ پاک ایسے شخص کوضرور فحش باتوں (یعنی بے حیائیوں ) اور گناہوں کے کاموں سے بچائے گا۔ (تفسیر خازن،3/452 ملخصا)
نَماز دُرُست نہ پڑھنے سے متعلق احادیثِ مبارَکہ
رُکوع و سجود صحیح ادا کرو!
حضرت ابوہریرہ رضی اللہُ عنہ روایت کرتے ہیں کہ سرکارِ مدینہ صلی اللہ علیہ واٰلہٖ وسلم کا فرمانِ عبرت نشان ہے: اِنسان ساٹھ (60) برس تک نماز پڑھتا رہتا ہے لیکن اُس کی کوئی نماز بارگاہِ الٰہی میں مقبول نہیں ہوتی کیونکہ وہ شخص رُکوع اور سجدے پورے طور سے ادا نہیں کرتا۔ (الترغیب والترہیب ،1/240،حدیث:757)
نَماز کی بعض غلطیوں کی نشاندہی
اعلیٰ حضرت رحمۃُ اللہِ علیہ اِرشاد فرماتے ہیں : (لوگ)نماز میں (اس طرح)سجدہ کر تے ہیں کہ پاؤں کی اُنگلیوں کے(صرف) سِر ے زمین پر لگتے ہیں حالانکہ حکم ہے کہ پیٹ (یعنی انگلی کا وہ حصّہ جو چلنے میں زمین پرلگتا ہے) لگے، ایک اُنگلی کا پیٹ لگنا فرض اور ہر پاؤں کی اکثر (مثلاً تین تین) انگلیوں کا پیٹ زمین پر جما ہونا واجب ہے۔(فتاوٰی رضویہ،3/253 ملخصا) (اور دسوں کا پیٹ لگ کر انگلیوں کا قبلہ رُو ہونا سنت ہے) صرف ناک کی نوک پر سجدہ کرتے ہیں حالانکہ حکم ہے کہ جہاں تک ہڈّی کا سخت حصہ ہے، لگنا چاہئے۔ عُموماً دیکھا جاتا ہے کہ رکوع سے ذرا سر اٹھا یا اور سجدے کی طرف چلے گئے، سجدے سے ایک بالِشت سر اٹھایا یا بہت ہوا ذرا (مزید) اٹھالیا اور وہیں دوسرا سجدہ ہوگیا حالانکہ (رکوع کے بعد ) پورا سیدھا کھڑا ہونا اور (دو سجدوں کے درمیان کم ازکم ایک سبحانَ اللہ کہنے کی مقدار پورا) بیٹھنا چاہیے۔ اس طر ح اگر 60 برس نماز پڑھے گا قبول نہ ہوگی۔ ایک شخص مسجد اَقدس میں حاضر ہوئے اور بہت تیز ی سے جلد ی جلدی نماز پڑھی بعد ِنماز حاضر ہو کر سلام عرض کیا، فرمایا:وَعَلَیْکَ السَّلَام، اِرْجِعْ فَصَلِّ فَاِنَّکَ لَمْ تُصَلِّ (یعنی) واپس جا پھر پڑھ کہ تو نے نماز نہ پڑھی ۔ انہوں نے دوبارہ ویسے ہی پڑھی، پھر یہی ارشاد ہوا ۔ آخِر میں اُنہوں نے عرض کی: قسم اُس کی جس نے حضور (صلی اللہ علیہ واٰلہٖ وسلم) کو حق کے ساتھ بھیجا، مجھے ایسی ہی آتی ہے، حضور فرمائیں ! (کس طرح پڑھوں ؟) فرمایا: رُکوع و سجود بَاطمینان کر اور رکوع سے سیدھا کھڑا ہو اور دونوں سجدوں کے درمیان سیدھا بیٹھ ۔ (بخاری،1/268، حدیث:757 ملخصا) (ملفوظات اعلیٰ حضرت ،ص291)
کس نماز کی طرف نظرِ رحمت نہیں ہوتی؟
حضرت طَلْق بن علی رضی اللہُ عنہ بیان کرتے ہیں کہ میں نے اللہ پاک کے پیارے نبی صلی اللہ علیہ واٰلہٖ وسلم کو فرماتے سنا :” اللہ پاک اُس بندے کی نماز کی طرف نظر نہیں فرماتا جو رُکوع و سُجود(یعنی سجدے )میں اپنی پیٹھ سیدھی نہیں کرتا۔“ (معجم کبیر ،8/338، حدیث:8261) رکوع و سُجود میں پیٹھ سیدھی کرنے کا مطلب تَعْدیلِ اَرْکان یعنی رُکوع،سُجود،قَوْمہ اورجَلْسہ میں کم از کم ایک بار” سبحانَ اللہ “ کہنے کی مقدار ٹھہرنا ہے۔
پیٹھ سیدھی نہ کرنے والے کی مثال
حضرت علیُّ المُرتضیٰ شیرِ خدا رضی اللہُ عنہ بیان کرتے ہیں کہ سرکارِ نامدار، دو جہاں کے سردار صلی اللہ علیہ واٰلہٖ وسلم نے مجھے حالتِ رُکوع میں قِراء َت کرنے سے منع کیا اور ارشاد فرمایا: اے علی! نماز میں پُشْت(یعنی پیٹھ) سیدھی نہ کرنے والے کی مثال اُس حامِلہ عورت کی طرح ہے کہ جب بچے کی پیدائش کا وقت قریب آئے تو حمل گرادے، اب نہ تو وہ حاملہ رہے اور نہ ہی بچے والی۔ (مسند ابو یعلیٰ، 1/166،حدیث:310)
کتاب کا موضوع
کتاب کا موضوع
- دُرُود شریف کی فضیلت
- نماز بُرائیوں سے روکتی ہے
- نماز پڑھنے کے باوُجُود گناہ کیوں ہو جاتے ہیں ؟
- صحیح نماز ہی بُرائیوں سے بچاتی ہے
- نَماز دُرُست نہ پڑھنے سے متعلق احادیثِ مبارَکہ
- رُکوع و سجود صحیح ادا کرو!
- نَماز کی بعض غلطیوں کی نشاندہی
- کس نماز کی طرف نظرِ رحمت نہیں ہوتی؟
- پیٹھ سیدھی نہ کرنے والے کی مثال
- تذکرۂ مولیٰ علی رضی اللہُ عنہ
- مولیٰ علی کی شان بَزبانِ نبیِّ غیب دان
- تم مجھ سے ہو
- علی کی زیارت عبادت ہے
- ”علی“کے تین حروف کی نسبت سے مولا علی کے مزید 3فضائل
- وفات شریف
- نماز کا چور
- چور کی دو قسمیں
- کون سی نَماز مُنہ پر مار دی جاتی ہے؟
- صرف پوری نَماز قَبول ہوتی ہے
- رزق میں تنگی کا خطرہ
- نمازی کی اِصلاح ہو ہی گئی(حکایت)
- چور بھی اگر صحیح نماز پڑھے تو سدھر سکتا ہے
- نماز کی نَقل کرنے والے ڈاکو گرفتاری سے بچ گئے
- ایک عاشقِ مَجازِی کی عجیب و غریب حکایت
- شیطان رونے لگا(حکایت)
- یااللہ! ہمیں پکّا نمازی بنا
- دعوتِ اسلامی میں کیسے آیا!
- نَماز کا خُوب خیال رکھو
- کمزوروں کے صدقے رحمت ہی رحمت
- نیک بندوں کے صدقے بلائیں دور ہوتی ہیں
- (2) 40اَبْدال کی بَرَکت سے بارش
- ”اَبْدال“ کے معنیٰ
- (3) میں جب عذاب دینے کا ارادہ کرتا ہوں ۔۔۔
- (4) دودھ پیتے بچّے بھی عذاب دور رہنے کا سبب ہیں
- (5) سو گھروں سے بلائیں دور
- جنَّتی گُلاب سے پیدا کی گئی حُوریں
