اي ڪاش! جو اسان به دنيا جي لاءِ نه بلڪه پنهنجي خالقِ حقيقي جي رِضا جي لاءِ ڪم ڪرڻ واريون بڻجي وڃون۔ اي ڪاش! جو اسان به مخلوق جي بدران شريعت جي اِتباع ڪرڻ واريون بڻجي وڃون۔

سٺي ڳالهائڻ جي اهميت

عاشقانِ رسول اسلامي ڀينرون! اسان سچ ڳالهائڻ جي باري ۾ بيان ٻُڌِي رهيون آهيون۔ هن ۾ شڪ ناهي ته الله پاڪ اِنسان کي بيشمار نعمتن سان نوازيو آهي، انهن مان هڪ عظيم نعمت ”زَبان“ به آهي، زَبان بظاهر گوشت جي هڪ ننڍڙي ٻوٽي آهي، پر رب تعالي جي عظيمُ الشَّان نعمت آهي۔ زَبان جو دُرُست اِستِعمال جنَّت ۽ غَلَط استِعمال جهنَّم ۾ داخل ڪري سگھي ٿو۔ جيڪڏهن ڪو پنهنجي زبان جو دُرُست اِستعمال ڪندي صدقِ دل (يعني سچي دل) سان ڪلمو شريف پڙهي وٺي ته ان جي لاءِ جنَّت واجب ٿي ويندي آهي جيئن ته نور واري آقا، دِلين کي جڳمڳائڻ واري مصطفيٰ صَلَّى اللهُ تَعَالٰى عَلَيْهِ وَاٰلِهٖ وَسَلَّم جو فرمان آهي: مَنْ قَالَ لَاۤ اِلٰہَ اِلَّا اللہُ دَخَلَ الْجَنَّۃَ وَ وَجَبَتْ لَہ الْجَنَّۃُ جنهن لَاۤ اِلٰه اِلَّا الله چيو اهو جنت ۾ داخل ٿيندو ۽ ان جي لاءِ جنت واجب ٿي ويندي۔ (مستدرڪ للحاڪم، ڪتاب التو بة والانابة،باب من قال لا الٰه ..الخ، ۵/۳۵۶، حديث:۷۷۱۳)

۽ جيڪڏهن اها ئي زَبان مَعَاذَالله (الله جي پناھ)، الله پاڪ جي نافرماني ۾ استعمال ٿي ته تمام وڏي آفت جو سبب بڻجي سگھي ٿي جيئن ته فرمانِ مصطفيٰ صَلَّى اللهُ تَعَالٰى عَلَيْهِ وَاٰلِهٖ وَسَلَّم  آهي: اِنسان جون اڪثر خطائون ان جي زَبان سان ٿينديون آهن۔ (شعب الايمان،باب في حفظ اللسان،۴ /۲۴۰، حديث:۴۹۳۳ )

تنهنڪري عقل مند اها ئي آهي جيڪا زبان جو چڱي طرح استعمال ڪري ۽ ان کي بُري استعمال کان بچائي، زبان جو سٺو استعمال ڪيترو فائدي مند آهي جڏهن ته ان جو بُرو استعمال ڪيترو نقصان ده ٿي سگھي ٿو، اچو هن باري ۾ هڪ دلچسپ فرضي حڪايت ٻڌون ٿيون:

ٻن پوڙهين پاڙيسرين جي آکاڻي