سچّا خُدا اللہ رَبُّ الْعَالَمِیْن ہے ، اے لوگو ! رسولِ رحمت ، شفیعِ اُمّت صَلَّی اللہ علیہ وَآلہٖ و َسَلّم اس دعویٰ پر نہایت ہی پختہ اور مضبوط دلیل بن کر تمہارے پاس تشریف لے آئے ہیں۔  ^{( [1] )}

رَبِّ اعلیٰ کی نعمت پہ اعلیٰ درود         حق تَعَالیٰ کی مِنَّت پہ لاکھوں سلام ^{( [2] )}

وضاحت : اللہ پاک کی سب سے اعلیٰ و اَرْفع نعمت (  ہم غریبوں کے آقا و مولا ، ہماری شفاعت فرمانے ، ہمیں بخشوانے والے آقا صَلَّی اللہ عَلَیْہِ وَ آلِہٖ وَسَلَّم )  پر اَعْلیٰ درود اور اللہ پاک کے اس اِحْسَانِ عظیم پر لاکھوں سلام ہوں۔

مشہور مفسرِ قرآن ، حکیم الاُمَّت مفتی احمد یار خان نعیمی رَحمۃُ اللہ عَلَیْہ فرماتے ہیں : * اَنْبیائے کرام  علیہمُ السّلام  کے معجزات اللہ پاک کی ذات و صِفَات کی دلیل ہوتے ہیں * گزشتہ اَنْبیائے کرام  علیہمُ السّلام  کو اللہ پاک نے مختلف معجزات عطا فرمائے * حضرت موسیٰ  عَلَیْہِ السّلام کا ہاتھ مبارک معجزہ تھا * حضرت داؤد  عَلَیْہِ السّلام کی آواز مبارک معجزہ تھی * حضرت یوسُف  عَلَیْہِ السّلام کا حُسْن مبارک معجزہ تھا ، اسی طرح پہلے اَنْبیائے کرام  علیہمُ السّلام  میں کسی کو 1 معجزہ عطا ہوا ، کسی کو 2 معجزے عطا ہوئے ، اِن سب اَنْبیائے کرام  علیہمُ السّلام  کے بعد اللہ پاک نے اپنے سب سے آخری نبی ، رسولِ ہاشمی ، مُحَمَّدِ عربی صَلَّی اللہ علیہ وَآلہٖ و َسَلّم کو سَر سے  لے کر پاؤں تک معجزہ بنا کر بھیجا ^{( [3] )}  اور فرمایا : اے لوگو ! تمہارے پاس تمہارے رَبّ کی جانِب سے نہایت پختہ اور مضبوط دلیل آ گئی۔

دئیے معجزے انبیا کو خُدا نے           معجزہ بن کے آیا ہمارا نبی

سرکار  کی  آمد !  مرحبا !                      سردار   کی    آمد !     مرحبا !