پختہ دلیل کو بُرہان کہتے ہیں۔ اس آیتِ کریمہ میں بُرہان سے مُراد ہمارے آقا و مولا ، مکی مدنی مصطفےٰ  صَلَّی اللہ علیہ وَآلہٖ و َسَلَّم  ہیں یعنی دعویٰ یہ ہے کہ کائنات کا ایک خالِق ، ایک مالِک ہے اور وہ ایک سچّا خُدا اللہ رَبُّ الْعَالَمِیْن ہے ، اے لوگو ! رسولِ رحمت ، شفیعِ اُمّت صَلَّی اللہ علیہ وَآلہٖ و َسَلَّم اس دعویٰ پر نہایت ہی پختہ اور مضبوط دلیل بن کر تمہارے پاس تشریف لے آئے ہیں۔  ^{( [1] )}

مشہور مفسرِ قرآن ، حکیم الاُمَّت مفتی احمد یار خان نعیمی رَحمۃُ اللہ عَلَیْہ فرماتے ہیں : * اَنْبیائے کرام علیہمُ السّلام کے معجزات اللہ پاک کی ذات و صِفَات کی دلیل ہوتے ہیں * گزشتہ اَنْبیائے کرام علیہمُ السّلام کو اللہ پاک نے مختلف معجزات عطا فرمائے * حضرت موسیٰ  عَلَیْہِ السّلام کا ہاتھ مبارک معجزہ تھا * حضرت داؤد  عَلَیْہِ السّلام کی آواز مبارک معجزہ تھی * حضرت یوسُف  عَلَیْہِ السّلام کا حُسْن مبارک معجزہ تھا ، اسی طرح پہلے اَنْبیائے کرام علیہمُ السّلام میں کسی کو 1 معجزہ عطا ہوا ، کسی کو 2 معجزے عطا ہوئے ، اِن سب اَنْبیائے کرام علیہمُ السّلام کے بعد اللہ پاک نے اپنے سب سے آخری نبی ، رسولِ ہاشمی ، مُحَمَّدِ عربی صَلَّی اللہ علیہ وَآلہٖ و َسَلَّم کو سَر سے  لے کر پاؤں تک معجزہ بنا کر بھیجا ^{( [2] )}  اور فرمایا : اے لوگو ! تمہارے پاس تمہارے رَبّ کی جانِب سے نہایت پختہ اور مضبوط دلیل آ گئی۔

دئیے معجزے انبیا کو خُدا نے                                                               معجزہ بن کے آیا ہمارا نبی

سرکار  کی  آمد ! مرحبا !                                                                                                          سردار   کی    آمد !    مرحبا !

اچھّے  کی  آمد ! مرحبا !                                                                                                               سچّے  کی  آمد ! مرحبا !