Sharaf De Mujhe Hajj Ka

شرف دے حج کا مجھے میرے کبریا یارب

شرف دے حج کا مجھے میرے کبریا یارب

روانہ سُوئے مدینہ ہو قافِلہ یارب

دِکھا دے ایک جھلک سبز سبز گنبد کی

بس اُن کے  جلووں میں آجائے پھر قضا یارب

مِرا ہو گُنبدِ خَضْرا  کی ٹھنڈی چھاؤں میں

رسولِ پاک کے قدموں میں خاتِمہ یارب

بوقتِ نَزْع سلامت رہے مِرا ایماں

مجھے نصیب ہو توبہ ہے التجا یارب

جواب قبر میں مُنکَر نکیر کو دوں گا

ترے کرم سے اگر حوصلہ ملا یارب

بروزِ حشر چھلکتا سا جام کوثر کا

بدستِ ساقیِ کوثر ہمیں پلا یارب

بقیعِ پاک میں عطّاؔر دَفْن ہوجائے

برائے غوث و رضا از پئے  ضِیا یارب

وسائلِ بخشش(مُرمّم) ، ص87

از شیخِ طریقت امیرِ اہلِ سنّت   دَامَتْ بَرَکَاتُہُمُ الْعَالِیَہ

نام  تیرا  یانبی  میرا  مُفرّحِ  جان  ہے

نام تیرا یانبی میرا مُفرِّحِ جان ہے

تیرے نامِ پاک سے دل میرا شاد ہر آن ہے

جس گھڑی مشکل میں لیوے کوئی تیرا نامِ پاک

یارسولَ اللہ! مشکل اس کی سب آسان ہے

قُرب میں اپنے جگہ دی تیرے ربِّ پاک نے

واسطہ آدم نے چاہا ، یہ تو تیری شان ہے

تُو وہ ہے اللہ خود تعریف کرتا ہے تِری

اور تِرا مَدّاح یاں دنیا میں خود قرآن ہے

جو وسیلہ تم سے چاہے اس کا بیڑا پار ہے

جو نہ جانے تم کو شافع ، وہ تو بے ایمان ہے

نوح نے طوفان میں ، یوسف نے ہے زِندان میں

رب سے تیرا واسطہ چاہا ، یہ تیری شان ہے

واں خلیلُ اللہ نے آتش سے پائی تھی نجات

اور شفاعت کا تِری خواہاں یہاں برہاؔن ہے

جذباتِ برہان ، ص125

از خلیفۂ اعلیٰ حضرت  مفتی برہانُ الحق جبل پوری رحمۃ اللہ علیہ

مُفرِّح : راحت پہنچانے والا۔ شاد : خوش۔ مَدّاح : تعریف کرنے والا۔ شافع : شفاعت کرنے والا۔ زِندان : قید خانہ۔ آتش : آگ۔ خواہاں : خواہش مند۔

خلیفۂ اعلیٰ حضرت مفتی برہان  الحق جبل پوری رحمۃ اللہ علیہ نے یہ نعت شریف صرف 9سال کی عمر میں تحریر فرمائی تھی۔