غریب نواز رَحمۃُ اللہِ عَلَیْہ کی شان میں نعرے بھی لگائے جاتے ہیں اور منقبتیں بھی پڑھی جاتی ہیں۔  اللہ پاک ان محبتوں کو سلامت رکھے ، خواجہ غریب نواز رَحمۃُ اللہِ عَلَیْہ کے صدقے امیر اہلسنت دَامَتْ بَرَکَاتُہُمُ الْعَالِیَہ کو درازئ عمر بالخیر عطا فرمائے اور محبتِ اولیا کا یہ فیضان یُونہی جاری و ساری رہے۔ آمِیْن بِجَاہِ خَاتَمِ النَّبِیّٖن صَلَّی اللہُ عَلَیْہِ وَاٰلِہٖ وَسَلَّم ۔   

تیری الفت میں جیوں ، تیری محبت میں مروں    ہو کرم ایسا شہا! خواجہ پیا! خواجہ پیا!

ایک ذَرَّہ ہو عطا ، عطّؔار کے ہو جائے گا           خواجہ! گھر بھر کا بھلا خواجہ پیا! خواجہ پیا!

صَلُّوْا عَلَی الْحَبیب!                                               صَلَّی اللّٰہُ عَلٰی مُحَمَّد

خواجہ غریب نواز رَحمۃُ اللہِ عَلَیْہ کا مختصر تَعارُف

پیارے اسلامی بھائیو!  خواجہ غریب نواز رَحمۃُ اللہِ عَلَیْہ چھٹی صدی ہجری کی بڑی بلند رُتبہ شخصیت ہیں ، آپ 537 ہجری کو سِجِسْتان کے علاقے سَنجر میں پیدا ہوئے ، اسی نسبت سے آپ کو سنجریکہا جاتا ہے۔ خواجہ صاحب رَحمۃُ اللہِ عَلَیْہ کا نامِ پاک حَسَن ہے اور مُعِیْنُ الدِّیْن ، غریب نواز ، سلطان الہند ، وارثُ النبی ، عطائے رسول آپ کے مشہور القاب ہیں۔ ^([1]) “ خواجہ “ فارسی زبان کا لفظ ہے ، اس کا معنی ہے : سردار۔ آقا۔ ^([2])

خواجۂ خواجگاں مُعِیْنُ الدِّیْن                       فخرِ کون ومکاں مُعِیْنُ الدِّیْن

خواجہ غریبِ نواز رَحمۃُ اللہِ عَلَیْہ نَجِیبُ الطَّرَفَین ہیں یعنی والِد اور والدہ دونوں کی طرف سے سَیَّد زادے ہیں ، 12 واسطوں سے آپ  کا سلسلۂ نسب مسلمانوں کے چوتھے خلیفہ اَمِیْرُ الْمُؤْمِنِیْن مولا علی مشکل کشا رَضِیَ اللّٰہُ عَنْہُ تک پہنچ جاتا ہے۔ ^([3])