چراغِ انجمنِ اَوْلیا غریب نواز              امینِ سَطْوَتِ خیبر کُشَا غریب نواز

گُلِ حدیقۂ حسنین ، نورِ چَشْمِ علی              فدائے سیرتِ خیر الوریٰ غریب نواز

وضاحت : اے خواجہ غریب نواز رَحمۃُ اللہِ عَلَیْہ! آپ اَوْلیائے کرام کی محفل کے چراغ ہیں ، آپ خیبر فتح کرنے والے مولائے کائنات ، مولا علی رَضِیَ اللّٰہُ عَنْہُ کی شُجاعت کے امین ہیں ، آپ امام حَسَن و امام حُسَین رَضِیَ اللہُ عَنْہُمَا کے باغ کا پھول حضرت علی رَضِیَ اللّٰہُ عَنْہُ  کی آنکھ کا تارا ہیں اور مصطفےٰ جانِ رَحْمت صَلَّی اللہُ عَلَیْہِ وَاٰلِہٖ وَسَلَّم  کی سُنّتوں کے شیدائی ہیں۔      

خواجہ غریب نواز رَحمۃُ اللہِ عَلَیْہ 96 سال دُنیا میں تشریف فرما رہے ، 6 رجب ، 633 ہجری ، بروز پیر شریف ، صبح فجر کے وقت مُرِیْدَین انتظار میں تھے کہ پیرو مرشد تشریف لائیں گے ، نمازِ فجر پڑھائیں گے مگر حُضُور خواجہ غریب نواز رَحمۃُ اللہِ عَلَیْہ نے نہ آنا تھا ، نہ آئے ، کافِی دیر گزر جانے کے بعد حُجرے کا دروازہ کھول کر دیکھا تو غم کا سمندر اُمنڈ آیا ، خواجۂ خواجگان ، سلطان الہند ، خواجہ غریب نواز ، مُعِیْنُ الدِّیْن حَسَن سنجری چشتی ، اجمیری رَحمۃُ اللہِ عَلَیْہ وصال فرما چکے تھے ، دیکھنے والوں نے یہ ایمان افروز منظر آنکھوں سے دیکھا کہ خواجہ صاحب رَحمۃُ اللہِ عَلَیْہ کی نورانی پیشانی پر لکھا تھا : حَبِیْبُ اللہِ مَاتَ فِی حُبِّ اللہِ اللہ کا محبوب بندہ ، محبتِ الٰہی میں وِصَال کر گیا۔ خواجہ غریب نواز رَحمۃُ اللہِ عَلَیْہ کا مزار مُبَارَک ہند کے مشہور شہر اجمیر صوبہ راجِستھان شمالی ہند میں ہے۔ ^([1])

خواجۂ ہند وہ دربار ہے اعلیٰ تیرا             کبھی محروم نہیں مانگنے والا تیرا

پھر مجھے اپنا دَرِ پاک دِکھا دو!                 آنکھیں پُر نور ہوں پھر دیکھ کر جلوہ تیرا

صَلُّوْا عَلَی الْحَبیب!                                               صَلَّی اللّٰہُ عَلٰی مُحَمَّد