جو نہ بُھولا ہم غریبوں  کو رضا               یاد اُس کی اپنی عادت کیجئے!

  اے عاشقانِ رسول ! ذرا تَصَوُّر تو باندھئے! یہ حُضُور، جانِ کائنات صَلّی اللہُ عَلَیْہِ وَآلِہٖ وَسَلَّم کاہم غلاموں پر کتنا بڑااِحْسَان ہے، ہم اس پر جتنا ناز کریں،کم ہے، ہم بَس سَر جھکا کر،ہاتھ باندھ کر اتنا ہی عرض کر سکتے ہیں کہ یارسولَ اللہ صَلّی اللہُ عَلَیْہِ وَآلِہٖ وَسَلَّم!

تیری معراج کہ تُو جانے کہاں تک پہنچا                        میری معراج کہ میں تیرے قدم تک پہنچا

   صَلُّوا عَلَی الْحَبیب!                                                        صَلَّی اللّٰہُ عَلٰی مُحَمَّد

عرشِ اعظم پرنوازشاتِ مصطفےٰ صَلّی اللہُ عَلَیْہِ وَآلِہٖ وَسَلَّم

پیارے اسلامی بھائیو! اللہ پاک کے آخری نبی، رسولِ ہاشمی،مُحَمَّد عربی صَلّی اللہُ عَلَیْہِ وَآلِہٖ وَسَلَّم نے مسجدِاَقْصیٰ میں انبیائے کرام عَلَیْہِمُ السَّلَام کو نماز پڑھائی،پھر خطبے ہوئے،اس کے بعد معراج کے دولہا،دوجہاں کے آقا صَلّی اللہُ عَلَیْہِ وَآلِہٖ وَسَلَّم نے آسمانوں کا رُخ فرمایا، دیکھتے ہی دیکھتے پہلا آسمان آیا، دروازہ کھلا، حضور (صَلّی اللہُ عَلَیْہِ وَآلِہٖ وَسَلَّم) اُوپر تشریف لے گئے، دوسرا آسمان آیا، دروازہ کھلا،حضور (صَلّی اللہُ عَلَیْہِ وَآلِہٖ وَسَلَّم) اُوپر تشریف لے گئے، پھر تیسرا آسمان، پھر چوتھا آسمان، پھر پانچواں، پھر چھٹا، پھر ساتواں، یُوں آسمان آتے گئے، دروازے کھلتے گئے، حُضُورِ اکرم، نورِ مجسم صَلّی اللہُ عَلَیْہِ وَآلِہٖ وَسَلَّم اوپر تشریف لے جاتے گئے، یہاں تک کہ سِدْرَۃُ المنتہیٰ پر پہنچے، یہاں آکر جبریلِ امین عَلَیْہِ السَّلَام نے ادب سے عرض کیا: یارسولَ اللہ صَلّی اللہُ عَلَیْہِ وَآلِہٖ وَسَلَّم! میری خدمت یہیں تک تھی، اس سے آگے اگر ایک قدم بھی بڑھوں گاتو میرے پَر جَل جائیں گے۔^([1])