Book Name:Shab e Baraat kese Guzaren
معاف فَضْل و کرم سے ہو ہر خطا یارَبّ! ہو مغفرت پئے سلطانِ انبیا یارَبّ!
بِلا حساب ہو جنّت میں داخِلہ یارَبّ! پڑوس خُلد میں سَروَر کا ہو عطا یارَبّ!
صَلُّوْا عَلَی الْحَبیب! صَلَّی اللّٰہُ عَلٰی مُحَمَّد
(3) : دِل سے بُغْض و کینہ نکال دیجئے!
پیارے اسلامی بھائیو ! روایات کے مطابق جو بدنصیب شبِ براءَت جیسی عظیم رات میں بھی مغفرت سے محروم رہتے ہیں ، ان میں ایک بغض و کینہ رکھنے والا بھی ہے۔
یقیناً ہم میں سے ہر ایک مغفرت و بخشش کا طلب گار اور حاجت مند ہے ، اس لئے شبِ براءَت آنے سے پہلے پہلے ان تمام گناہوں سے تَوبہ کے ساتھ ساتھ یہ بھی ضروری ہے کہ ہم اپنا دِل صاف کر لیں ، دِل میں کسی کا بُغْض و کینہ (یعنی پوشیدہ دُشمنی) ، کسی سے متعلق حَسَد ، کسی کے لئے مَیْل نہ رہے۔
اللہ پاک قرآنِ کریم میں ارشاد فرماتا ہے :
یَوْمَ لَا یَنْفَعُ مَالٌ وَّ لَا بَنُوْنَۙ(۸۸) اِلَّا مَنْ اَتَى اللّٰهَ بِقَلْبٍ سَلِیْمٍؕ(۸۹) (پارہ : 19 ، سورۂ شعرآء ، آیت : 88-89)
ترجمہ کنز الایمان : جس دِن نہ مال کام آئے گا نہ بیٹے مگر وہ جو اللہ کے حُضُور حاضِر ہوا سلامت دِل لے کر۔
معلوم ہوا قیامت کے دِن نہ مال کام آئے گا ، نہ اَوْلاد کام آئے گی ، قیامت کے دِن قلبِ سلیم کام آئے گا۔ قلبِ سلیم کیا ہے؟ * وہ دِل جو کفر و شرک سے پاک ہو * جس دِل میں بدعقیدگی نہ ہو * وہ دِل جو باطنی بیماریوں سے پاک ہو * جس میں حسد نہ ہو * بغض نہ ہو * کینہ نہ ہو * دُنیا کی محبت نہ ہو ، ایسے پاکیزہ دِل والا روزِ قیامت کامیاب ہو گا۔