Book Name:Ramzan Mubarak Kesay Guzaren
یہ 3 اَوْقات جو عُمُوماً غفلت کی نذر ہو جاتے ہیں ، ان اوقات کو عبادت میں ، اچھے کاموں میں گزارنے کی کوشش کرنی ہے * عَلّامہ اِبْنِ رجب حنبلی رَحمۃُ اللہِ عَلَیْہ فرماتے ہیں : وہ وقت کہ جب عموماً لوگ غفلت کا شِکار ہوتے ہیں ، اس وقت عبادت کرنا اللہ پاک کے ہاں محبوب عَمَل ہے * مزید فرماتے ہیں : اللہ پاک کے بعض نیک بندے بطورِ خاص مغرب سے عشاء تک نمازیں پڑھا کرتے تھے اور فرماتے تھے : یہ وہ وقت ہے جب لوگ عموماً غفلت کا شکار ہوتے ہیں۔ ([1]) * احادیث میں رات کو جب لوگ سو رہے ہوں ، اس وقت نماز پڑھنے کے خصوصی فضائل آئے ہیں ، اللہ پاک کے نبی ، رسولِ ہاشمی صلی اللہُ عَلَیْہِ وَ آلِہٖ وَسَلَّم نے فرمایا : سلام کو عام کرو ، لوگوں کو کھانا کھلاؤ اور رات کے وقت جب لوگ سو رہے ہوتے ہیں اس وقت نماز پڑھو تو سلامتی کے ساتھ جنت میں داخل ہو جاؤ گے۔ ([2]) * اسی طرح بازار میں ذِکْرُ اللہ کرنے کے فضائل ہیں ، کیوں؟ اس لئے کہ بازار غفلت کا مقام ہے۔
بازار میں ذِکْر اللہ کرنے والوں کی بخشش ہو گئی
منقول ہے : 2 دوست تھے ، ان کا بازار سے گزر ہوا ، ایک دوست نے کہا : دیکھو! لوگ خرید و فروخت میں مصروف ہیں ، ذِکْرُاللہ سے غافل ہیں ، آؤ! ہم یہاں ذِکْرُ اللہ کرتے ہیں ، چنانچہ دونوں ایک طرف کھڑے ہو گئے اور ذکر اللہ کرنے لگے ، کچھ عرصے کے بعد ان میں سے ایک دوست کا انتقال ہو گیا ، دوسرے دوست نے مرنے والے کو خواب میں دیکھا ، مرنے والے دوست نے کہا : کیا تم جانتے ہو؟ اس دن ہم دونوں نے بازار میں ذِکْرُ اللہ کیا تھا ، اللہ پاک نے اسی دِن ہم دونوں کی بخشش فرما دی تھی۔ ([3])