پیارے اسلامی بھائیو! اچھی نیت بندے کو جنّت میں پہنچا دیتی ہے ، بیان سننے سے پہلے کچھ اچھی اچھی نیتیں کر لیجئے! مثلاً نیت کیجئے : * رِضَائے اِلٰہی کے لئے بیان سُنوں گا* عِلْمِ دین سیکھوں گا * پُورا بیان سُنوں گا * ادب سے بیٹھوں گا * نصیحت حاصِل کروں گا * اَحْمَدِ مجتبیٰ ، مُحَمَّد مصطفےٰ  صلی اللہُ عَلَیْہِ وَ آلِہٖ  وَسَلَّم  کا نامِ پاک سُن کر درودِ پاک پڑھوں گا۔

صَلُّوْا عَلَی الْحَبیب!                                                                                               صَلَّی اللّٰہُ عَلٰی مُحَمَّد

صحابئ رسول حضرت عبد اللہ بن عبّاس  رَضِیَ اللہُ عنہ  سے روایت ہے ، اللہ پاک کے آخری نبی ، رسولِ ہاشمی ، مکی مدنی ، مُحَمَّد  عربی  صلی اللہُ عَلَیْہِ وَ آلِہٖ  وَسَلَّم  نے فرمایا : اللہ پاک ماہِ رمضان میں روزانہ افطار کے وقت 10 لاکھ ایسے گنہگاروں کو جہنّم سے آزاد فرماتا ہے ، جن پر گُنَاہوں کی وجہ سے جہنّم واجِب ہو چکا تھا اور ماہِ رمضان کے شبِ جمعہ اور روزِجمعہ (یعنی جمعرات کو سورج ڈوبنے سے لے کر جمعہ کو سورج ڈوبنے تک) کی ہر ہر گھڑی میں ایسے 10 ، 10 لاکھ گنہگاروں کو جہنّم سے آزاد کیا جاتا ہے جو عذاب کے حقدار قرار دئیے جا چکے ہوتے ہیں۔ ^([1])

اے عاشقانِ رمضان! اللہ پاک کا فضل و احسان کہ ہمیں ماہِ رمضان نصیب ہوا ، آج ماہِ رمضان کا پہلا جمعۃ المبارک ہے ، افطار کے قریب کا وقت ہے ، ہماری خوش نصیبی کہ ہم اُن گھڑیوں میں سانس لینے کی سَعَادت حاصِل کر رہے ہیں ، جن گھڑیوں میں خوب مغفرت کے پروانے تقسیم ہوتے ہیں۔ اللہ کرے کہ اس ماہِ رمضان میں مغفرت کی خیرات پانے والوں میں ہم گنہگاروں کابھی نام شامِل ہو جائے۔

نصیب تیرے کرم سے چمک اُٹھا یارَبّ!     جہاں میں پھر مہِ رمضان آگیا یارَبّ!