هڪ ڀيري حضرت مُطرف بن عبد الله رَحۡمَةُ اللهِ عَلَيۡه وٽ ويا، ان وقت حضرت مُطرف تي بيهوشي طاري هئي، حضرت ثابت بناني رَحۡمَةُ اللهِ عَلَيۡه ڏٺو ته بيهوشي واري حالت ۾ حضرت مُطرف رَحۡمَةُ اللهِ عَلَيۡه مان نُور جون 3 شُعَائون بُلند ٿي رهيون آهن، هڪ مٿي وٽان، ٻي پيٽ وٽان ۽ ٽيئن پيرن واري پاسي کان۔ فرمائن ٿا: هي ڏسي اسان گھبرائجي وياسين، جڏهن پاڻ ڪجھ بهتر ٿيا ته اسان عرض ڪيو: اسان اوهان جي مٿي، پيٽ ۽ پيرن جي وٽان نُور جون شُعَائون بلند ٿيندي ڏٺيون آهن۔ حضرت مُطرف رَحۡمَةُ اللهِ عَلَيۡه فرمايو: ڇا واقعي توهان ايئن ڏٺو آهي؟ عرض ڪيم: جي ها! ان تي حضرت مُطرف رَحۡمَةُ اللهِ عَلَيۡه فرمايو: هي سورت حٰم السَّجده جي تلاوت جي برڪت آهي۔ هن سورت سڳوري جون 30 آيتون آهن، ابتدائي 10 آيتون مٿي وٽان، وچ واريون 10 آيتون، وچ وٽان ۽ آخر جون 10 آيتون پيراندي وٽان بلند ٿين ٿيون ۽ مون کي يقين آهي ته هي منهنجي شفاعت به ڪندي۔^([1])

سورت ڪهف جي برڪت

سيفُ الدِّين بَلبَان جو بيان آهي ته مون قبرستان ۾ هڪ شخص ڏٺو، هو هڪ قبر وٽ ويهي روئي روئي تلاوت ڪري رهيو هو، مون روئڻ جو سبب پڇيو ته ان چيو: هي منهنجي دوست جي قبر آهي، ان منهنجي اکين جي سامهون تلاوت ڪندي ساھ ڏنو هو، تدفين کان بعد مون ان کي خواب ۾ ڏٺو، ان مون کي ٻڌايو ته جڏهن توهان سڀئي مون کي قبر ۾ رکي موٽي ويا ته هڪ غضبناڪ ڪتّو مون ڏانهن وڌيو، قريب هو جو هو مون تي حملو ڪري ها پر هڪ انتهائي خوبصورت ۽ پاڪيزه بزرگ اتي آيا ۽ ڪتي کي اتان ڀڄائي ڪڍيو ۽ مون وٽ ويهي رهيا، ان جي صحبت سان مون کي تمام گھڻو سڪون مليو، مون ان کان پڇيو: اوهان ڪير آهيو؟ فرمايائون: توهان جمعي جي ڏينهن سورت ڪهف پڙھندا ها مان انهيء جو ثواب آهيان۔^([2])