آہ! رمضان اب جا رہا ہے                      ہائے تڑپا کے رمضاں چلا ہے

ٹکڑے ٹکڑے مرا دِل ہوا ہے                 ہائے تڑپا کے رمضاں چلا ہے

دیکھ کر چاند میں رو پڑا تھا                         سامنے ہجر کا غم کھڑا تھا

جلد رخصت کا وقت آ گیا ہے                    ہائے تڑپا کے رمضاں چلا ہے

اشک آنکھوں سے اب بِہ رہے ہیں           ہجر کا غم جو ہم سہ رہے ہیں

وہ دِلِ غمزدہ جانتا ہے                           ہائے تڑپا کے رمضاں چلا ہے

کر کے تقسیم بخشش کی اَسناد                      آہ! رنجیدہ دِل کر کے تُو شاد

سب کو روتا ہوا چھوڑتا ہے                     ہائے     تڑپا     کے     رمضاں     چلا     ہے^([1])

جمعۃ الوداع کے بیان میں جان دیدی

ایک بزرگ  رَحمۃُ اللہِ عَلَیْہ  فرماتے ہیں : میں ماہِ رَمَضان کے جُمُعَۃُ الوَداع کے روز حضرتِ منصور بن عَمَّار  رَحمۃُ اللہِ عَلَیْہ  کی محفل میں حاضر ہوا۔ آپ رَمضان شریف کے روزوں کی فضیلت ، راتوں کی عبادت اور خلوص کے ساتھ عبادت کرنے والوں کے لئے جو اَجْر تیار کیا گیا ہے اُس کے متعلق بیان فرما رہے تھے ، یوں لگ رہا تھا گویا آپ کے بیان کے اثر سے ٹھوس پتھروں سے آگ ظاہر ہو رہی ہے لیکن آپ  رَحمۃُ اللہِ عَلَیْہ  کی محفل میں نہ کسی نے حرکت کی ، نہ ہی کسی نے اپنے گناہوں پر نَدامت کا اظہار کیا ، جب آپ  رَحمۃُ اللہِ عَلَیْہ  نے محفل کی یہ حالت دیکھی تو فرمایا : اے لوگو! کیا اپنے عیبوں سے آگاہ ہو کر کوئی رونے والا نہیں ؟