حضرت امیر ِحمزہ سے محبّت کا حکم

اللہ پاک قرآنِ کریم میں ارشاد فرماتا ہے :

قُلْ لَّاۤ اَسْــٴَـلُكُمْ عَلَیْهِ اَجْرًا اِلَّا الْمَوَدَّةَ فِی الْقُرْبٰىؕ-   (پارہ : 25 ، سورۂ شورٰی : 23)       

ترجَمہ کنزُ الایمان : تم فرماؤ : میں  اس پر تم سے کچھ اُجرت نہیں مانگتامگر قرابت کی محبت ۔

اس آیتِ کریمہ میں رسولِ اکرم ، نورِ  مُجَسَّم  صلی اللہُ عَلَیْہِ وَ آلِہٖ وَسَلَّم   کے قرابت داروں سے محبت کا حکم دیا گیا ، حضرت امیرِ  حمزہ  رَضِیَ اللہُ عنہ   بھی سرورِ عالم ، نورِ  مُجَسَّم  صلی اللہُ عَلَیْہِ وَ آلِہٖ وَسَلَّم   کے قرابت دار ہیں بلکہ حضرت امیرِ  حمزہ  رَضِیَ اللہُ عنہ   تو کئی جہتوں سے رسولِ اکرم ، نورِ  مُجَسَّم  صلی اللہُ عَلَیْہِ وَ آلِہٖ وَسَلَّم   کے قرابت دار ہیں : (1) : آپ رسولِ کریم ، رءوف و رحیم  صلی اللہُ عَلَیْہِ وَ آلِہٖ وَسَلَّم   کے چچا جان ہیں(2) : حضرتامیرِ حمزہ  رَضِیَ اللہُ عنہ   کی والدہ اُمِّ مصطفےٰ سیدہ آمنہ  رَضِیَ اللہُ عنہا  کی چچا زاد بہن ہیں ، یوں حضرتامیرِ حمزہ  رَضِیَ اللہُ عنہ   پیارے نبی ، رسولِ ہاشمی  صلی اللہُ عَلَیْہِ وَ آلِہٖ وَسَلَّم   کے خالہ زاد بھائی ہوئے(3) : حضرت امیرِ  حمزہ  رَضِیَ اللہُ عنہ  سرورِ عالَم ، نورِ  مُجَسَّم  صلی اللہُ عَلَیْہِ وَ آلِہٖ وَسَلَّم   کے رضاعی بھائی بھی ہیں کہ حضرت ثُوَیْبَہ اور حضرت حلیمہ سعدیہ  رَضِیَ اللہُ عنہما  جو رسولِ خُدا ، احمدِ مجتبیٰ  صلی اللہُ عَلَیْہِ وَ آلِہٖ وَسَلَّم   کی رضاعی مائیں ہیں ، حضرت امیرِ حمزہ  رَضِیَ اللہُ عنہ  نے بھی ان دونوں سے دودھ نوش فرمایا ہے۔ ^([1])

یُوں حضرت امیرِ حمزہ  رَضِیَ اللہُ عنہ  سرورِ عالَم ، نورِ  مُجَسَّم  صلی اللہُ عَلَیْہِ وَ آلِہٖ وَسَلَّم   کے 3 جہتوں سے قرابت دار ہیں ، لہٰذا آپ سے محبت کرنا بھی ہر مسلمان پر لازِم و ضروری ہے۔

کیا پوچھتے ہو کیا  ہیں حضرت امیرِ حمزہ       حیرت کی انتہا ہیں حضرت امیرِ حمزہ