Book Name:Shoq e Hajj
مکّے مدینے کی محبت سے دل کو پُر نور بنانے کے لئےعاشقانِ رسول کی دینی تحریک دعوتِ اسلامی کے دینی ماحول سے وابستہ ہو جائیے ذیلی حلقے کے 12دینی کاموں میں خوب بڑھ چڑھ کر حصہ لیجئے اِنْ شَآءَ اللہُ الْکَرِیْم! دین و دنیا کی بے شمار برکتیں نصیب ہوں گی۔ ذیلی حلقے کے 12 دینی کاموں میں سے ایک دینی کام مدنی قافلہ بھی ہے۔
شیخوپورہ( پنجاب ، پاکستان) کے ایک اسلامی بھائی کی تحریر کا خلاصہ ہے : الحمدللہ !مجھے عُمرہ شریف کرنے کا شَرَف ملا ، وہاں قُصُور( پنجاب ، پاکستان) کے ایک قاری صاحِب سے ملاقات ہوئی ، اُنہوں نے بتایا میں نےدعوتِ اسلامی کے عاشِقانِ رسول کے ساتھ تین دن کے مَدَنی قافِلے میں سفر کی سعادت حاصِل کی اور وہاں خوب رو رو کر مدینۂ منوّرہ کی حاضِری کےلئے دُعا مانگی ۔
دُعاکی قَبولیَّت کے آثاریوں ظاہِر ہوئے کہ جب مَدَنی قافِلے سے واپس آیااور حسبِ معمول بچّوں کو قرآنِ پاک پڑھانے کےلئے کسی کے گھر پہنچا۔ تو صاحِبِ خانہ کافی مہربانی سے پیش آئے اور کہا : قاری صاحِب ! مَاشَآءَاللّٰہ! آپ ہمارے بچّوں کو قرآنِ پاک کی تعلیم دیتے ہیں ، اگر آپ کی کوئی خواہش ہو تو بتا دیجئے ، ابتِداء ً میں نے ٹال مٹول سے کام لیا مگر اُن کے اِصرار پر کہہ د یا کہ دیدارِ مدینہ کی آرزو ہے۔ اُنہوں نے مجھے فوری طور پر اَخراجات پیش کر دیئے اور یوں اَلْحَمْدُلِلّٰہِ! مَدَنی قافِلے میں دُعا کرنے کی بَرَکت سے مجھ جیسے گنہگار اور غریب آدمی کو مدینۂ منوّرہ کی حاضِری کا شَرَف نصیب ہو گیا۔
مانگو آ کر دُعا پاؤ گے مُدَّعا در کرم کے کھلیں قافلے میں چلو
گر مدینے کا غم چاہیئے چشمِ نَم لینے یہ نعمتیں قافِلے میں چلو
صَلُّوْا عَلَی الْحَبیب! صَلَّی اللّٰہُ عَلٰی مُحَمَّد