اس میں سے جوچیزچاہیں گے ، اُن کے ساتھ کر دی جائے گی اور خرید و فروخت نہ ہوگی  * جنتی اس بازار میں باہم ملیں گے ، چھوٹے مرتبے والا بڑے مرتبے والے کو دیکھے گا ، اس کا لباس پسند کرے گا ، ابھی گفتگو ختم بھی نہ ہوگی کہ خیال کرے گا ” میرا لباس اُس سے اچھا ہے “ اور یہ اس وجہ سے کہ جنت میں کسی کے لیے غم نہیں ، *  جنتی باہم ملنا چاہیں گے تو ایک کا تخت دوسرے کے پاس چلا جائے گا ، * اُن میں اللہ کریم کے نزدیک سب میں عزت والا وہ ہے جو اﷲ پاک کے وجہِ کریم کے دیدار سے ہر صبح و شام مُشَرَّف ہوگا ، *  جب جنتی جنت میں جا لیں گے اﷲ پاک اُن سے فرمائے گا : کچھ اور چاہتے ہو جو تم کو دوں؟عرض کریں گے : تُو نے ہمارے منہ روشن کیے ، جنت میں داخل کیا ، دوزخ سے نجات دی۔ اُس وقت پردہ کہ مخلوق پر تھا اُٹھ جائے گا تو دیدارِ الٰہی سے بڑھ کر انھیں کوئی چیز نہ ملی ہوگی۔

صَلُّوْا عَلَی الْحَبِیْب !                                            صَلَّی اللہُ عَلٰی مُحَمّد

سُبْحٰنَ اللہ ! آپ نے سُنا کہ جنت کیسی حسین ودلکش ہے اور ربِّ کریم نے اس میں کیسی کیسی عظیمُ الشان نعمتیں رکھی ہیں ، لہٰذا اگر ہم بھی جنت کی ان عظیم الشان نعمتوں میں سے حصّہ پانا چاہتے ہیں اور چاہتے ہیں کہ ہمارا آخری ٹھکانہ جنت ہو تو ہمیں جیتے جی جنت میں لے جانے والے اعمال کرنے ہوں گے۔ایک عمل تو آپ نے سنا کہ صُلْحُ کروانا جنت میں لے جانے والا عمل ہے۔آئیے ! جنت میں لے جانے والے چند مزید اعمال کے بارے میں سنتے ہیں۔یہاں یہ بات ذہن نشین رہے کہ جنت میں جانے کیلئے ایمان لانے کے ساتھ ساتھ اچھے اعمال کا ہونابھی بہت ضروری ہے۔