کھول کر بیان بھی کر دیا ، پھر بھی لوگوں نے صِراطِ مستقیم کو قبول نہ کیا ، آخری نبی ، رسولِ ہاشمی صَلَّی اللہ عَلیہ وَآلہٖ و َسَلَّم نے چاند کو 2  ٹکڑے کیا ، سُورج کو الٹے پاؤں پلٹایا ، پتھروں نے کلمے پڑھے ، درختوں نے سلامیاں پیش کیں ، ایسے معجزات دیکھ کر بھی کفّار نے یہی کہا :

هٰذَا سِحْرٌ مُّبِیْنٌ ( ۶ )     ( پارہ : 28 ، سورۂ صَفّ : 6 )

تَرجَمہ کَنْزُ الْعِرْفان : یہ کُھلا جادو ہے۔

معلوم ہوا؛ قرآنِ کریم ملنا یہ بھی ہدایت ہے ، نبیوں ، رسولوں کا تشریف لانا ، یہ بھی ہدایت ہے اور حق کو قبول کرنے والی عقل مل جانا ، ایسا پاکیزہ دِل مل جانا ، یہ بھی ہدایت ہے اور ہدایت کے معاملے میں یہ سب سے اہم چیز ہے۔

اس لحاظ سے اِهْدِنَا الصِّرَاطَ الْمُسْتَقِیْمَۙ ( ۵ )  کا حاصِل یہ بنے گا : اے مالِکِ کریم ! تُو نے اپنے محبوب نبی ، رسولِ ہاشمی صَلَّی اللہ عَلیہ وَآلہٖ و َسَلَّم کو بھیج کر ، اُن پر کتابِ ہدایت قرآنِ کریم نازِل فرما کر ہمارے لئے ہدایت کا سامان کر دیا ، اے رَبِّ کریم ! اب اپنے اِنْعام یافتہ بندوں جیسی سمجھ بھی نصیب فرما ، اپنے محبوبِ کریم صَلَّی اللہ عَلیہ وَآلہٖ و َسَلَّم کے ساتھ ایسی ایمانی وابستگی نصیب فرما ، جیسی صحابۂ کرام علیہمُ الرّضوان  کو نصیب تھی ،  قرآنِ کریم کو سمجھنے کی ایسی صلاحیت عطا فرما ، جیسی تُو نے اولیائے کرام کو عطا فرمائی تھی ، اے مالِک و مولیٰ ! حق واضِح ہو چکا ، اس حق کو سمجھ کر اس پر چلنے کے لئے ہمیں صحابہ ، تابعین ، امامِ اعظم ، غوثِ پاک ، داتا حُضُور ، خواجہ غریب نواز ، اعلیٰ حضرت امام احمد رضاخان  رَحمۃُ اللہ عَلَیْہم  کی عقل و سمجھ کا فیضان بھی نصیب فرما۔اٰمِیْن بِجَاہِ  خَاتَمِ النَّبِیّٖنَ  صَلَّی اللہ عَلَیْہِ وَ آلِہٖ وَ سَلَّم ۔     

الٰہی ! نہیں مانگتا مال و دولت               فقط تجھ سے تیری رِضا مانگتا ہوں

صحابہ کی اور اولیا کی محبَّت                  کی خیرات تجھ سے خُدا مانگتا ہوں ^{( [1] )}