سَفَرِ مِعْراج سے متعلق رِوایات میں ہے : جب سرکارِ عالی وقار ، مکی مدنی تاجدار صلی اللہ عَلَیْہِ وَ آلِہٖ وَسَلَّم بیت المقدس تشریف لائے تو آپ کی بلند شان کے اِظْہار اور اِستقبال کے لئے تمام  اَنبیائے کرام علیہم السلام    پہلے سے یہاں جمع تھے ، ان سب حضرات نے آپ عَلَیْہِ السَّلَام   کو دیکھ کر خُوش آمدید کہا ، پھر جب نماز کا وقت ہوا تو حضرت جبریل عَلَیْہِ السَّلَام   نے دستِ مُبارَک پکڑ کر آگے بڑھا دیا اور آپ صلی اللہ عَلَیْہِ وَ آلِہٖ وَسَلَّم نے تمام اَنبیائے کرام علیہم السلام   کی امامت فرمائی۔  ^{( [1] )}

آپ کی معلومات کے لئے عَرض کروں؛عَلَّامَہ مَحْمُود آلوسی رحمۃُ اللہ عَلَیْہ  نقل فرماتے ہیں کہ آپ صلی اللہ عَلَیْہِ وَ آلِہٖ وَسَلَّم نے اَنبیائے کرام علیہم السلام    کو 2رکعت نماز پڑھائی اور اس کی پہلی رکعت میں سُورۂ کافِرون کی تِلاوت فرمائی اور دُوسری رکعت میں سُورۂ اِخْلاص کی تِلاوت فرمائی۔اَنبیا کی 7 صفیں تھیں ، ان میں سے 3 صفیں مُرسلین کی تھیں۔  ^{( [2] )}

سُبْحٰنَ اللہ ! کیا خُوب نمازہوگی اور کیسا حَسِین مَنْظر ہو گا کہ تمام اَنبیا اور رُسُل علیہم السلام   مُقْتَدِی ہیں۔

مقتدی ہیں سارے اَنبیاء                                                                                          مصطفٰے اِمام ہو گئے

 یقیناً  کائنات میں ایسی نماز کبھی نہیں ہوئی ، کیسا نِرالا اَنداز تھا کہ اَذان دینے والے سیِّدُ الملائکہ حضرت جبریل امین عَلَیْہِ السَّلَام   تھے ، نماز پڑھنے والے اَنبیاء علیہم السلام   تھے اورنماز پڑھانے والے  سیِّدُ الاَنبیاء صلی اللہ عَلَیْہِ وَ آلِہٖ وَسَلَّم تھے ، فلک نے ایسا نظارہ کبھی نہیں دیکھا۔

اعلیٰ حضرت رحمۃُ اللہ عَلَیْہ نے بہت کمال بات کہی ، لکھتے ہیں :

سب سے اوّل سب سے آخر                                                                    ابتداء ہو انتہا ہو

پاک کرنے کو وضو تھے                                                                                                       تم نماز ِ جاں فزا ہو