Book Name:Safar e Meraj aur Pyari Namaz
اے عاشقانِ رسول ! * آج مِعْراج کی رات ہے * آج کی رات فرشتوں کے سردار حضرت جبریلِ امین عَلَیْہِ السَّلَام بارگاہِ رسالت میں حاضِر ہوئے اور مِعْراج کی خوشخبری سُنائی * آج کی رات مِعْراج کے دُولہا ، امامُ الاَنبیا صلی اللہ عَلَیْہِ وَ آلِہٖ وَسَلَّم نے مسجدِ اقصیٰ میں تمام نبیوں اور رسولوں کی اِمامت فرمائی * آج ہی کی رات اللہ پاک نے اپنے محبوب نبی ، رسولِ ہاشمی صلی اللہ عَلَیْہِ وَ آلِہٖ وَسَلَّم کو آسمانوں کی سیر کروائی * جنّت ودوزخ دکھائی * عرش پہ بُلایا اور آج ہی کی رات اللہ پاک نے اپنے سب سے محبوب نبی ، مُحَمَّدِ عَرَبی صلی اللہ عَلَیْہِ وَ آلِہٖ وَسَلَّم کو اپنے دیدار سے مُشَرَّف فرمایا۔
باغِ عالَم میں بادِ بہاری چلی سرورِ انبیاء کی سواری چلی
یہ سُواری سُوئے ذاتِ باری چلی اَبرِ رَحْمَت اُٹھا آج کی رات ہے
طُور چوٹی کو اپنی جُھکانے لگا چاندنی چاند ہر سُو دِکھانے لگا
عَرْش سے فَرش تک جگمگانے لگا رشکِ صبحِ صفا آج کی رات ہے
عِطْرِ رَحْمَت فرشتے چھڑکتے چلے جس کی خُوشبو سے رستے مہکتے چلے
چاند تارے جِلو میں چمکتے چلے کہکشاں زیرِ پا آج کی رات ہے
جذبِ حُسْنِ طلب ہر قدم ساتھ ہے دائیں بائیں فرشتوں کی بارات ہے
سر پہ نورانی سہرے کی کیا بات ہے شاہ دُولہا بنا آج کی رات ہے
* * * * *
مرحبا ! مرحبا ! صاحبِ مِعْراج رحمتِ کبریا ! صاحبِ مِعْراج
لطفِ حق ہو گیا ! صاحبِ مِعْراج شاہِ ہر دو سرا ! صاحبِ مِعْراج
تم کو مِعْراج کا ! صاحبِ مِعْراج حق سے مُژْدَہ ملا ! صاحبِ مِعْراج
رہبر و رہنما ! صاحبِ مِعْراج نیک دیجئے بنا ! صاحبِ مِعْراج