فرمانِ مصطفےٰ صَلّی اللہ عَلَیْہ وآلِہ وسَلَّم : اَفْضَلُ الْعَمَلِ اَلنِّيَّۃُ الصَّادِقَۃُ سچی نیت  سب سے افضل عمل ہے۔ ^{( [1] )}  اے عاشقانِ رسول ! ہر کام سے پہلے اچھی اچھی نیتیں کرنے کی عادت بنائیے کہ اچھی نیت بندے کو جنت میں داخِل کر دیتی ہے۔ بیان سننے سے پہلے بھی اچھی اچھی نیتیں کر لیجئے ! مثلاًنیت کیجئے ! * عِلْم سیکھنے کے لئے پورا بیان سُنوں گا * بااَدب بیٹھوں گا * دورانِ بیان سُستی سے بچوں گا  * اپنی اِصْلاح کے لئے بیان سُنوں گا * جو سُنوں گا دوسروں تک پہنچانے کی کوشش کروں گا۔

صَلُّوْا عَلَی الْحَبِیْب !                                            صَلَّی اللہ  عَلٰی مُحَمَّد

               پیارے پیارے اسلامی بھائیو ! اللہ پاک کالاکھ لاکھ شکر اورکروڑ ہا کروڑ احسان کہ ایک بار پھر ہمیں رَمَضانُ الْمُبارَک کی بہاریں نصیب ہورہی ہیں ، بہت ہی جلد رَمَضانُ الْمُبارَک  کا خوبصورت مہینا اپنے دامن میں رحمتیں مغفرتیں اور ہمارے لئے بہت سی ایسی بَرکتیں لئے ہوئے ہمارے درمیان  جلوہ گَر ہونے والا ہے جن کا ہمیں اندازہ بھی نہیں جیساکہ حدیث ِ پاک ہے : اگرلوگوں کو معلوم ہوتا کہ رَمَضان میں کیا ہےتومیری اُمّت تمنَّا کرتی : کاش ! پورا سال رَمضان ہی ہو۔ ^{( [2] )} اِنْ شَآءَ اللہ آج دعوتِ اسلامی کے اس ہفتہ وار سنّتوں بھرے اجتماع میں ہم اسی حوالے سے بیان سننے کی سعادت حاصل کریں گے کہ رَمَضانُ الْمُبارَک کی کیا عظمتیں اور فضیلتیں ہیں اور اس کی اَہمیت کس قدر زیادہ ہے اور ہمیں رَمَضانُ الْمُبارَک کا مُقَدَّس اور محترم مہینا کس طرح گزارنا چاہیے ، اس کے علاوہ بھی بہت سے فائدہ مند نِکات بیان کئے جائیں گے۔