دِل کی جانِب بولتے ہیں  ( 5 ) : امیرِ اہلسنت دَامَت بَرَکاتہمُ الْعَالِیَہ  کی ایک بہت ایمان افروز ادا یہ ہے کہ آپ مدینہ منورہ کے کنکروں ، پتھروں اور درختوں کو اپنے ایمان کا گواہ بناتے ہیں۔

اللہ پاک ہمیں بھی مدینہ منورہ  بلکہ پیارے آقا ، مکی مدنی مصطفےٰ صَلَّی اللہ عَلَیْہِ وَآلِہٖ وَسَلَّم کی ہر ہر نسبت کا خُوب ادب کرنے کی توفیق عطا فرمائے۔ آمین بِجَاہِ خَاتَمِ ا لنَّبِیّٖنَ  صَلَّی اللہ عَلَیْہِ وَآلِہٖ وَسَلَّم

صَلُّوْا عَلَی الْحَبِیْب !                                                                                                صَلَّی اللہ عَلٰی مُحَمَّد

مدینہ طیبہ دارُ الایمان ہے

اے عاشقانِ رسول ! مدینہ طیبہ کی محبت عشقِ رسول اور کمالِ ایمان کی عَلامت ہے۔ اللہ پاک ہم سب کو مدینہ منورہ کی بےپناہ محبت نصیب فرمائے۔ قرآنِ مجید میں ارشاد ہوتا ہے :

وَ الَّذِیْنَ تَبَوَّؤُ الدَّارَ وَ الْاِیْمَانَ مِنْ قَبْلِهِمْ   ( پارہ28 ، سورۃالحشر : 9 )

ترجمہ کنزُ العِرفان : اور وہ جنہوں نے ان  ( مہاجرین )  سے پہلے اس شہر کو اور ایمان کو ٹھکانہ بنا لیا۔

اس آیت کے تحت عَلَّامہ بیضاوی رَحمۃُ اللہ عَلَیْہ فرماتے ہیں : اس آیت میں اللہ پاک نے مدینۂ پاک کو ” اِیْمان  ( یا دارُ الْاِیْمَان )  “ فرمایا ، اس کی وجہ یہ ہے کہ ایمان مدینۂ پاک ہی سے پھیلا ہے اور دوبارہ اسی کی طرف لوٹ جائے گا۔ ^{( [1] )}  مُعْجَم ِاَوْسط کی حدیثِ پاک ہے ، میرے پیارے نبی ، آخری نبی ، رسولِ ہاشمی صلی اللہ عَلَیْہِ وَ آلِہٖ وَسَلَّم نے فرمایا : اَلْمَدِیْنَۃُ دَارُ الْاِیْمَان مدینہ ایمان کا گھر ہے۔  ^{( [2] )}