عملی ثبوت دیتے ہوئے ، رَبِّ کریم کی رضا کی خاطِر اپنے بیٹے کے گلے پر چھری رکھی اور عشق و محبّت ، اِتّباع و اطاعت اور جذبۂ اِیْثار و اُلْفت کی لازوال مثال قائِم فرمائی۔

عِیدِ قرباں جذبۂ ایثار کا اِظْہار ہے                                               یہ اطاعت کا خلیل اللہ کی معیار ہے

ہے یہ تسلیم و رضا کی ایک لافانی مثال                  جان دینے کے لئے فرزند بھی تیار ہے

باپ کا حُسْنِ عَمَل ، بیٹے کا ذوقِ اتباع                        اس مثالی داستاں کا مرکزی کردار ہے

10 ذو الحج کی فضیلت

اللہ پاک کے آخری نبی ، رسولِ ہاشمی  صلّی اللہ ُ عَلَیْہِ وَ آلِہٖ وَسَلَّم نے فرمایا : اِنَّ اَعْظَمَ الْاَیَّامِ عِنْدَ اللہ  یَوْمُ النَّحْرِ بےشک اللہ پاک کے ہاں سب سے عظمت والا دِن یومُ النَّحْر  ( یعنی  10 ذُو الحج کا دِن ) ہے۔ ^{( [1] )}

حضرت براء بن عازِب رَضِیَ اللہ عنہ صحابئ رسول ہیں ، آپ فرماتے ہیں : یَوْمُ النَّحْر  ( یعنی عید الاضحیٰ کے پہلے دِن )  سرکارِ عالی وقار ، مکی مدنی تاجدار صلّی اللہ ُ عَلَیْہِ وَ آلِہٖ وَسَلَّم نے خطبہ دیتے ہوئے فرمایا : اِنَّ اَوَّلَ مَا نَبْدَءُ بِہٖ فِیْ یَوْمِنَا ہٰذَا اَنْ نُصَلِّیَ یعنی آج کے دِن ہم سب سے پہلا کام جو کریں گے وہ  ( عید کی )  نماز پڑھنا ہے ثُمَّ نَرْجعَ فَنَنْحَرَ پِھر ہم گھروں کو جائیں گے اور قربانی کریں گے فَمَنْ فَعَلَ ذٰلِکَ فَقَدْ اَصَابَ سُنَّتَنَا پس جس نے ایسا ہی کیا ، وہ ہماری سُنّت کو پہنچ گیا۔ ^{( [2] )}  

عِیْدُ الاَضحیٰ کا سب سے پسندیدہ عمل

حدیث پاک کی مشہور کتابوں؛ تِرْمذِی و اِبْنِ ماجہ  میں مسلمانوں کی پیاری اَمِّی جان