داڑھی منڈوں سے آقا کی نفرت

روایت میں ہے : ایک مرتبہ دو اِیْرانی اَفْسَر  بارگاہِ رسالت میں حاضِر ہوئے ، یہ دونوں غیر مسلم تھے ، اس لئے ان کی داڑھیاں منڈی ہوئیں اور مونچھیں اتنی بڑی بڑی تھیں کہ لب ( اوپر والے ہونٹ ) کو ڈھانپ رہی تھیں۔ ان کے ایسے چہرے دیکھ کر سرکارِ عالی وقار ، مکی مَدَنی تاجدار صَلَّی اللہ عَلَیْہِ وَ آلِہٖ وَ سَلَّم نے نفرت سے چہرہ مُبارَک پھیر لیا اور فرمایا : تم پر ہلاکت ہو ، ایسا چہرہ بنانے کا تمہیں کس نے کہا ؟ وہ بولے : ہمارے رَبّ پرویز خسرو نے۔ ( اَسْتَغْفِرُ اللہ ! اَسْتَغْفِرُ اللہ ! ) ۔اس پر پیارے آقا ، مکی مَدَنی مصطفےٰصَلَّی اللہ عَلَیْہِ وَ آلِہٖ وَ سَلَّم نے فرمایا : مگر میرے رَبّ اللہ رَبُّ العالمین نے حکم دیا ہے کہ داڑھی بڑھاؤں اور مونچھیں کترواؤں۔ ^{( [1] )}

نیکیاں کر جلد تُو بدیوں سے بھاگ                                                     قبر میں ورنہ بھڑک اٹّھے گی آگ

چھوڑ دے داڑھی منڈانا ہے حرام                                             ایک  مٹھی  سے  گھٹانا  ہے  حرام ^{( [2] )}

بہر حال ! پیارے اسلامی بھائیو ! پیارے آقا صَلَّی اللہ عَلَیْہِ وَ آلِہٖ وَ سَلَّم کے سَفَرِ معراج سے ہمیں یہ سبق ملا کہ ہم نے ہمیشہ فطرت پر قائِم رہنا ہے ، فطرت کیا ہے ؟ دِینِ اسلام۔ یعنی ہم نے اسلام پر ، اسلامی اخلاق و آداب پر ، اسلامی انداز و اَطْوار پر ہمیشہ قائِم رہنا ہے۔ اللہ پاک ہم سب کو عمل کی توفیق نصیب فرمائے۔ اٰمِیْن بِجَاہِ خَاتَمِ النَّبِیّٖن صَلَّی اللہ عَلَیْہِ وَ آلِہٖ وَ سَلَّم۔

سُنّتوں سے بھائی رشتہ جوڑ تُو                                                                       نِت نئے فیشن سے منہ کو موڑ تُو

چھوڑ دے سارے غَلَط رَسم و رَواج                           سنتوں   پر   چلنے   کا   کر   عہد   آج ^{( [3] )}

صَلُّوْا عَلَی الْحَبِیْب !                                                صَلَّی اللہ عَلٰی مُحَمَّد