معراج کے دولہا ، سلطانِ دوجہاں صَلَّی اللہ عَلَیْہِ وَ آلِہٖ وَ سَلَّم عرش پر تشریف لے گئے اور عرشِ اعظم کی اس حسرت کو پُورا فرما دیا۔

پردہ رُخِ اَنْور سے جو اُٹھا شبِ معراج                                 جنّت کا ہوا رنگ دوبالا شبِ معراج

حُوروں نے بھی گایا یہ ترانہ شبِ معراج                خالِق نے محمد کو بلایا شبِ معراج

اے رحمتِ عالَم تیری رحمت کے تَصَدُّق    ہر ایک نے پایا ترا صدقہ شبِ معراج

جس وقت چلی شاہِ مدینہ کی سواری                                                  سجدے میں جھکا عرشِ مُعَلّیٰ شبِ معراج

مہمان بُلانے کے لئے اپنے نبی کو                                        اللہ نے جبریل کو بھیجا شبِ معراج

یہ شانِ جلالت کہ نہایت ہی ادب سے                    جبریل نے آقا کو جگایا شبِ معراج

جبریل تھکے ، ہو گئے سرکار روانہ                                                   منہ تکتا ہوا رہ گیا سدرہ شبِ معراج

ہمراہ سُواری کے تھیں افواجِ ملائک                                   بن کرچلے اس شان سے دولہا شبِ معراج

مدّت سے جو ارمان تھا ، وہ آج نکالا                                        حوروں نے کیا خُوب نظّارہ شبِ معراج

تھی راستہ بھر اُن پہ درودوں کی نچھاور                            باندھا گیا تسلیم کا سہرا شبِ معراج

دولہا تھے محمد تو براتی تھے فرشتے                                                     اس شان سے پہنچے مرے مولیٰ شبِ معراج

روشن ہوئے سب ارض و سما نور سے اس کے   جب ماہِ عرب عرش پہ چمکا شبِ معراج

ممکن ہی نہیں عقلِ دو عالَم کی رسائی                                    ایسا دیا اللہ نے رُتبہ شبِ معراج

تفصیل سے کی سیر مگر اس پہ یہ طُرَّہ                                      اک پل میں یہ طے ہو گیا رستہ شبِ معراج

زنجیر درِ پاک کی ہلتی ہوئی پائی                                                                             اور گرم تھا وہ بسترِ اعلیٰ شبِ معراج

اس میں سے جمیلِؔ رضوی کو بھی عطا ہو                     رحمت کا بٹا خاص جو حصّہ شبِ معراج ^{( [1] )}