- Home
- Al Madina Library
- Arbaeen e Hasani
- Khilafat Rashida
30 سے زائد لینگوئجز میں 5000 سے زائد اسلامی کتب کا خزانہ آن لائن پڑھیں اور ڈاؤن لوڈ کریں
Arbaeen e Hasani | اربعین حسنی
Khilafat Rashida Ke 30 Saal
اربعین حسنی
- Home
- Al Madina Library
- Arbaeen e Hasani
- Khilafat Rashida
جنتی جوانوں کے سردار امام حسن اور امام حسین رضی اللہ عنہما کی
عظمت و شان ظاہر کرنے والی 40 حدیثوں کا مجموعہ
اَرْبَعِیْنِ حَسَنی
اَلْحَمْدُ لِلّٰہِ رَبِّ الْعٰلَمِیْنَ وَالصَّلٰوۃُ وَالسَّلَامُ عَلٰی سَیِّدِ الْمُرْسَلِیْن ط اَمَّا بَعْدُ
فَاَعُوْذُ بِاللّٰہِ مِنَ الشَّیْطٰنِ الرَّجِیْم ط بِسْمِ اللّٰہِ الرَّحْمٰنِ الرَّحِیْم ط
’’اَرْبَعِیْن‘‘ میں دُرُود پاک لکھنے کی بَرَکَت
حضرت سیِّدُنا ابو العبّاس اُقْلِیْشِی رَحْمَۃُ اللہِ عَلَیْہ کوبعد وفات کسی نے خواب میں جنت میں دیکھا۔پوچھا:آپ نے یہ مَقام کیسے پایا؟ جواب دیا: اپنی کتاب ’’اَلْاَرْبَعِیْن‘‘میں کثرت سے دُرود شریف لکھنے کی وجہ سے ۔(القول البدیع، ص467)
صَلُّوا عَلَی الْحَبِیْب! صَلَّی اللہُ تَعَالٰی عَلٰی مُحَمَّد
خلافتِ راشِدہ کے 30 سال
حضرت سیدنا سفینہ رضی اللہ عنہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا:اَلْخِلَافَةُ بَعْدِيْ ثَلَاثُوْنَ سَنَةً ثُمَّ تَكُوْنُ مُلْکًایعنی میرے بعد خلافت تیس سال ہوگی، پھر بادشاہت ہوگی۔(صحیح ابن حبان،9/48،حدیث:6904)
امام محمد بن عبدالباقی زُرقانی مالکی رحمۃ اللہ علیہ اس حدیث شریف کے تحت فرماتے ہیں: حضرت سیدنا صدیق اکبر رضی اللہ عنہ کی مدتِ خلافت 2 سال،3 مہینے 9 دن ہے، حضرت سیدنا عمر فاروقِ اعظم رضی اللہ عنہ کی 10 سال،6مہینے،5 دن ، حضرت سیدنا عثمانِ غنی رضی اللہ عنہ کی 11 سال،11مہینے، 9 دن جبکہ شیرِ خدا حضرت سیدنا علی المرتضیٰ رضی اللہ عنہ کی مدتِ خلافت 4سال،9مہینے،7 دن ہے۔(ان چاروں حضرات کے بعد) 30سال کی مدت میں جو عرصہ رہ گیا تھا (یعنی 6 مہینے)وہ حضرت سیدنا امام حسن مجتبیٰ رضی اللہ عنہ کی مدتِ خلافت ہے،یہاں تک کہ سن 41ہجری میں جُمادی الاولی کے مہینے کے وَسط (Middle)میں آپ رضی اللہ عنہ حضرت سیدنا امیر معاویہ رضی اللہ عنہ کے لئے دست بردار ہوگئے۔(شرح الزرقانی علی المواھب،10/156)
پانچویں خلیفۂ راشد
صدرُ الشریعہ مفتی محمد امجد علی اعظمی رحمۃ اللہ علیہ فرماتے ہیں:نبی صلی اﷲ تعالیٰ علیہ وسلم کے بعد خلیفۂ برحق و امامِ مُطْلَق حضرت سیّدنا ابو بکر صدیق، پھر حضرت عمرِ فاروق، پھر حضرت عثمان غنی، پھر حضرت مولیٰ علی پھر چھ مہینے کے لیے حضرت امام حسن مجتبیٰ رضی اﷲ تعالیٰ عنھم ہوئے، اِن حضرات کو خلفائے راشدین اور اِن کی خلافت کو خلافتِ راشدہ کہتے ہیں کہ انھوں نے حضور صلی اﷲ تعالیٰ علیہ وسلم کی سچی نِیابَت (جانشینی)کا پورا حق ادا فرمایا۔ (بہار شریعت، 1/241)
ایک اور مقام پر فرماتے ہیں:مِنھاجِ نبوت(رسول اللہ صلی اللہ علیہ وآلہ وسلم کے طریقے ) پر خلافتِ حَقّہ راشِدہ تیس سال رہی، کہ سیّدنا امام حسن مجتبیٰ رضی اﷲ تعالیٰ عنہ کے چھ مہینے پر ختم ہوگئی۔ (بہار شریعت،1/257)
اے عاشقانِ رسول! عموماً جب خلفائے راشدین کا تذکرہ ہوتا ہے تو حضرت سیدنا امام حسن مجتبیٰ رضی اللہ عنہ کی خلافت کا ذکر کم ہی کیا جاتا ہے۔اس کی وجہ بیان کرتے ہوئے امام زُرقانی رحمۃ اللہ علیہ لکھتے ہیں:جن حضرات نے آپ کی خلافت کو شُمار(Count) نہیں کیا تو اس کی وجہ یہ ہے کہ اس کی مدت طویل نہیں تھی،گویا کہ آپ رضی اللہ عنہ کی خلافت اپنے والدِ ماجد کی خلافت میں ہی شامل ہے ،یہ دونوں مقدس ہستیاں ایک شخصیت کی طرح ہیں اور چوتھے خلیفۂ راشد کے تذکرے میں آپ کا ذکر بھی ہوجاتا ہے۔(شرح الزرقانی علی المواھب، 10/156)
اللہ پاک کے فضل و کرم سے فقیر راقم الحروف اس سے پہلے چاروں خلفائے راشدین یعنی حضراتِ ابوبکر و عمر و عثمان و حیدر رضی اللہ عنہم اجمعین کی عظمت وشان سے متعلق 40،40 حدیثوں کے مجموعے بنام ’’اربعینِ صدیقی‘‘ ،’’اربعینِ فاروقی‘‘، ’’اربعینِ عثمانی‘‘ اور’’اربعینِ حیدری‘‘ مرتب کرچکا ہے۔ اب پانچویں خلیفۂ راشد حضرت سیدنا امام حسن مجتبیٰ رضی اللہ عنہ کی عظمت و شان سے متعلق ’’ اَربعینِ حَسَنی‘‘ پیشِ خدمت ہے۔ اس مجموعے میں امام حسن رضی اللہ عنہ کے علاوہ آپ کے بھائی حضرت سیدنا امام حسین رضی اللہ عنہ سے متعلق احادیث بھی شامل ہیں۔
اس مجموعے کو ہم نے تین حصوں میں تقسیم کیا ہے۔’’فیضانِ امام حسن‘‘ کے نام سے پہلے حصے میں امام حسن رضی اللہ عنہ سے متعلق 12 حدیثیں،’’ فیضانِ امام حسین ‘‘کے نام سےدوسرے حصے میں امام حسین رضی اللہ عنہ سے متعلق 3 حدیثیں جبکہ’’ فیضانِ حسنین کریمین ‘‘کے نام سے تیسرے حصے میں دونوں شہزادوں سے متعلق 25 حدیثیں درج ہیں۔ اکثر احادیث کے تحت مستند کتابوں کی روشنی میں ضروری شرح یا وضاحت درج کی گئی ہے۔
حسنین کریمین رضی اللہ عنہما میں سے افضل کون؟
رسالے کے آخر میں ہم نے اعلیٰ حضرت امامِ اہلِ سنت امام احمد رضا خان رحمۃ اللہ علیہ کی زبانی اس بات کو ذکر کیا ہےکہ احادیث کی روشنی میں دونوں شہزادوں یعنی امام حسن رضی اللہ عنہ اور امام حسین رضی اللہ عنہ میں سے افضل کون ہے۔
فیضانِ امام حسن رضی اللہ عنہ
میرا یہ بیٹا سردار ہے
(1)حضرت سیدنا ابوبکرہ رضی اللہ عنہ کا بیان ہے:میں نے دیکھا کہ رسول اللہ صلی اللہ علیہ وآلہ وسلم منبر پر تشریف فرما ہیں اور امام حسن رضی اللہ عنہ آپ کے پہلو میں بیٹھے ہیں۔آپ صلی اللہ علیہ وآلہ وسلم کبھی لوگوں کی طرف دیکھتے ،کبھی اپنے نواسے کو ملاحظہ فرماتے اور ارشاد فرما تے:اِنَّ ابْنِيْ هٰذَا سَيِّدٌ وَلَعَلَّ اللَّهَ اَنْ يُّصْلِحَ بِهٖ بَيْنَ فِئَتَيْنِ عَظِيمَتَيْنِ مِنَ الْمُسْلِمِينَ یعنی میرا یہ بیٹا سردار ہے، اﷲ پاک اس کے ذریعے مسلمانوں کی دو بڑی جماعتوں کے درمیان صلح کرادے گا۔ (بخاری،2/214،حدیث:2704)
شرح ِ حدیث:
٭صدرُ الشریعہ مفتی محمد امجد علی اعظمی رحمۃ اللہ علیہ لکھتے ہیں:سیّدنا امام حسن مجتبیٰ رضی اﷲ تعالیٰ عنہ نے خلافت امیرِ معاویہ رضی اللہ عنہ کو سپرد کر دی اور ان کے ہاتھ پر بیعت فرمالی اور اس صُلح کو حضور ِاقدس صلی اﷲ تعالیٰ علیہ وسلم نے پسند فرمایا اور اس (حدیث میں اس) کی بِشارت دی۔(بہارِ شریعت،1/258)
٭امام ابنِ حجر مكی ہیتمی شافعی رحمۃ اللہ علیہ اس روایت کے تحت فرماتے ہیں:
اس روایت میں کئی فوائد ہیں: (رسول اللہ صلی اللہ علیہ وآلہ وسلم کی )نبوت کی نشانیوں میں سے ایک نشانی(کہ آپ نے غیب کی خبر دیتے ہوئے مستقبل کی بات بتادی)۔
حضرت سیدنا امام حسن بن علی رضی اللہ عنہما کی فضیلت کہ آپ نے مسلمانوں کو اختلاف و لڑائی سے بچانے اور اللہ پاک کی رضا پانے کے لئے حکومت ترک فرمادی۔
اس روایت سے مسلمانوں کے درمیان صلح کی فضیلت بھی ظاہر ہے۔
اس حدیث سے یہ بھی معلوم ہوا کہ نواسے کو بھی بیٹا کہہ سکتے ہیں۔ (فتح الالٰہ،10/604)
٭امام شَرَفُ الدین حسین بن محمد طِیبی رحمۃ اللہ علیہ اس حدیث شریف کے تحت فرماتے ہیں:(امام حسن رضی اللہ عنہ کے) شرف اور فضیلت کے لئے یہی بات کافی ہے،جس شخص کو رسول اللہ صلی اللہ علیہ وآلہ وسلم’’سَیِّد (سردار)‘‘کہیں ، اس سے بڑھ کر کون سردار ہوسکتا ہے۔ (شرح الطیبی،11/297،تحت الحدیث:6144)
خلافت کے بدلے غوثیت عطا ہوئی
امامِ اہلِ سنت امام احمد رضا خان رحمۃ اللہ علیہ فتاوی رضویہ جلد28،صفحہ392 پر لکھتے ہیں:
علامہ علی قاری حنفی مکی رحمۃ اللہ علیہ مُتَوَفّٰی ۱۰۱۴ھ کتاب ’’نُزْہَۃُ الْخَاطِرِ الْفَاتِرِ فِی تَرْجَمَۃِ سَیِّدِی الشَّرِیْفِ عَبْدِالْقَادِر ‘‘میں فرماتے ہیں : بیشک مجھے اکابر (بزرگوں)سے پہنچا کہ سیدنا امام حسن مجتبٰی رضی اللہ تعالٰی عنہ نے جب بخیالِ فتنہ وبلایہ خلافت ترک فرمائی اللہ عزوجل نے اس کے بدلے ان میں اورانکی اولادِ اَمجاد میں غوثیتِ عظمٰی کا مرتبہ رکھا۔ پہلے قطبِ اکبر خود حضور سیدنا امام حسن ہوئے اوراَوسَط(درمیان) میں صرف حضور سیدنا سید عبدالقادر اورآخر میں حضرت امام مہدی ہوں گے رضی اللہ تعالٰی عنہم اجمعین۔ (نزہۃ الخاطرالفاتر،ص19)
میرے سردار
حضرت سیدنا امام حسن مجتبیٰ رضی اللہ عنہ نے ایک ایسی مجلس میں جاکر سلام کیا جہاں حضرت سیدنا ابوہریرہ رضی اللہ عنہ بھی موجود تھے ،حاضرین نے سلام کا جواب دیا اور آپ وہاں سے تشریف لے گئے۔ حضرت سیدنا ابوہریرہ رضی اللہ عنہ کو اس بات کا پتا نہ چلا، جب آپ کی توجہ دلائی گئی کہ امام حسن رضی اللہ عنہ نے آکر سلام کیا ہے تو آپ(ان کے پیچھے جاکر) ملے اور ان الفاظ میں سلام کا جواب دیا: وَعَلَيْكَ يَا سَيِّدِيْ یعنی اے میرے سردار !آپ پر بھی سلام ہو۔عرض کیا گیا کہ آپ امام حسن رضی اللہ عنہ کو ’’میرے سردار ‘‘کہہ رہے ہیں۔ جواب دیا:میں گواہی دیتا ہوں کہ رسول اللہ صلی اللہ علیہ وآلہ وسلم نے ارشاد فرمایا: اِنَّهٗ سَيِّدٌ یعنی حسن سردار ہے۔(معجم کبیر،3/35،حدیث:2596)
نواسے کی تربیت فرمائی
(2)امام حسن مجتبیٰ رضی اللہ عنہ نے صَدَقہ کی کھجوروں میں سے ایک کھجور لے کر منہ میں ڈال لی۔نبیٔ کریم صلی اللہ علیہ وآلہ وسلم نے فرمایا: كِخْ كِخْ ،تاکہ وہ اس کھجور کو پھینک دیں۔پھر فرمایا: اَمَا شَعَرْتَ اَنَّا لَا نَاْكُلُ الصَّدَقَةَیعنی کیا تمہیں معلوم نہیں کہ ہم صَدَقہ نہیں کھاتے۔(بخاری،1/503،حدیث:1491) ایک روایت میں یہ الفاظ ہیں:اَمَا عَلِمْتَ اَنَّ آلَ مُحَمَّدٍ صَلَّى اللَّهُ عَلَيْهِ وَسَلَّمَ لَا يَاْكُلُونَ الصَّدَقَةَ یعنی کیا تم نہیں جانتے کہ آلِ محمد صَدَقہ نہیں کھاتے۔ (بخاری،1/501، حدیث:1485)
شرح ِ حدیث
شارحِ بخاری مفتی شریف الحق امجدی رحمۃ اللہ علیہ فرماتے ہیں:یہ (كِخْ كِخْ)وہ کلمہ ہے جو بچوں کو نامناسب باتوں سے روکنے کے لئے بولتے ہیں ۔ بعض روایتوں میں ہے (کہ)ان کے منہ میں انگلی ڈال کریہ کھجور نکال کر پھینک دی۔(اس حدیث سے )یہ بھی ثابت ہوا کہ بچے اگر چہ غیر مُکَلَّف (یعنی شرعی احکام کی پابندی سے آزاد) ہیں مگر انہیں بھی مَمْنُوعات کے اِرتِکاب سے روکا جائے اور یہ بھی بتادیا جائے کہ یہ چیز کیوں ممنوع ہے۔(نزہۃ القاری، 2/969)
محبوبِ مصطفیٰ صلی اللہ علیہ وآلہ وسلم
(3)حضرت سیدنا ابوہریرہ رضی اللہ عنہ کا بیان ہے کہ میں رسول اللہ صلی اللہ علیہ وآلہ وسلم کے ساتھ مدینۂ منورہ کے بازاروں میں سے ایک بازار میں تھا،جب آپ واپس تشریف لائے تو میں بھی واپس آگیا۔آپ صلی اللہ علیہ وآلہ وسلم نے تین بار ارشاد فرمایا:چھوٹا بچہ کہاں ہے؟حسن بن علی کو بلاؤ۔امام حسن رضی اللہ عنہ چلتے ہوئے آئے اور ان کے گلے میں سیپیوں کا ہار تھا۔حضور صلی اللہ علیہ وآلہ وسلم اور امام حسن رضی اللہ عنہ دونوں نے اپنے ہاتھ پھیلادیے اور آپ صلی اللہ علیہ وآلہ وسلم نے انہیں لپٹالیا ، پھر یہ دعا کی:اَللّٰهُمَّ اِنِّيْ اُحِبُّهٗ فَاَحِبَّهٗ وَاَحِبَّ مَنْ يُّحِبُّهٗ یعنی اے اللہ!میں اس سے محبت کرتا ہوں، تو بھی اس سے محبت فرمااور جو اس سے محبت رکھے اس سے بھی محبت فرما۔
حضرت سیدنا ابوہریرہ رضی اللہ عنہ کا بیان ہے کہ جب سے رسول اللہ صلی اللہ علیہ وآلہ وسلم نے یہ فرمایا، میرےنزدیک حضرت حسن بن علی رضی اللہ عنہماسے زیادہ محبوب اور پیار ا کوئی نہیں۔(بخاری،4/73،حدیث:5884)
اے اللہ !تیرے اس گناہ گار بندے کو بھی امام حسن مجتبیٰ رضی اللہ عنہ سمیت تمام صحابہ و اہلِ بیت رضی اللہ عنہم سے محبت ہے،یہ دعائے مصطفیٰ صلی اللہ علیہ وآلہ وسلم میرے حق میں بھی قبول فرما۔آمین بجاہ النبی الامین صلی اللہ علیہ وآلہ وسلم
شرح ِ حدیث
امام ابوزکریا یحیٰی بن شَرَف نَوَوِی رحمۃ اللہ علیہ لکھتے ہیں:اس حدیث میں امام حسن رضی اللہ عنہ سے محبت کی ترغیب اور آپ کی فضیلت کا بیان ہے۔(شرح النووی علی مسلم،15/192)
کتاب کا موضوع
کتاب کا موضوع
- ’’اَرْبَعِیْن‘‘ میں دُرُود پاک لکھنے کی بَرَکَت
- خلافتِ راشِدہ کے 30 سال
- پانچویں خلیفۂ راشد
- حسنین کریمین رضی اللہ عنہما میں سے افضل کون؟
- فیضانِ امام حسن رضی اللہ عنہ
- میرا یہ بیٹا سردار ہے
- خلافت کے بدلے غوثیت عطا ہوئی
- میرے سردار
- نواسے کی تربیت فرمائی
- محبوبِ مصطفیٰ صلی اللہ علیہ وآلہ وسلم
- مجھ سے محبت رکھنے والا حسن سے بھی محبت کرے
- پیاری پیاری سواری
- جوانانِ جنت کے سردار کو دیکھ لو
- سلامتی کی دعا
- شانِ حسن مجتبٰی بزبانِ امیر معاویہ رضی اللہ عنہما
- بوسہ گاہِ مصطفی ٰ صلی اللہ علیہ وآلہ وسلم
- ضروری وضاحت
- ان دونوں سے محبت فرما
- شہزادے اور غلام زادے پر شفقت
- نواسے کے لئے سجدے کو لمبا کردیا
- فیضانِ امام حسین رضی اللہ عنہ
- نواسے کے رونے سے تکلیف
- نواسے سے کھیلنے کا مبارک انداز
- حسين ميرا ہے
- فیضانِ حَسَنین کریمین رضی اللہ عنہما
- شہزادوں کی حفاظت کے لئے دعائے ابراہیمی کا اہتمام
- ان سے دشمنی مجھ سے دشمنی ہے
- دونوں شہزادے نانا جان کے کندھے پر
- خوشبوئے حسنین رضی اللہ عنہما
- یہ دونوں میرے بیٹے ہیں
- اے اللہ !ان سے محبت فرما
- جنتی جوانوں کے سردار
- مجھ سے محبت کرنے والا ان سے بھی محبت کرے
- میرے پُھول
- شہزادو ں کے لئے خطبہ روک دیا
- تمہارا دشمن میرا دشمن ہے
- یہ میرے گھر والے ہیں
- مُبَاہَلہ کیا ہے؟
- یہ میرے اہلِ بیت ہیں
- اہلِ بیت سے مراد کون؟
- ام المؤمنین کو مبارک چادر کے نیچے کیوں نہ لیا؟
- قربِ مصطفیٰ صلی اللہ علیہ وآلہ وسلم
- نواسوں کے لئے نانا جان کی وِراثت
- حسن میرا ہے
- حسنین کریمین کی پیاس کیسے بجھی؟
- شہزادوں کو مبارک کندھوں پر سوار کرنے کا انداز
- غیب سے روشنی کا انتظام
- نانا جان کے سامنے کُشتی
- جن کی محبت لازم ہے
- نانا جان کے کندھوں پر
- کتنے اچھے سوار ہیں
- نواسے سے محبت کا انوکھا انداز
- حسنین کریمین رضی اللہ عنہما میں سے افضل کون؟
- پانچ جنتی جوان
