آسمانِ قادریت پر چمکنے والا روشن ستارہ

 فیضانِ شیخ عبدُ الواحد تمیمی رحمۃُ اللہِ علیہ

دُعائے عطار: یاربَّ المصطفےٰ ! جو کوئی 21 صفحات  کا رسالہ ’’ فیضان شیخ عبدُ الواحد تمیمی رحمۃُ اللہِ علیہ“ پڑھ یا سُن لے اُسے سلسلۂ قادریہ کے بُزرگانِ دین رحمۃُ اللہِ علیہم کے فیضان سے مالا مال فرما اور بے حساب بخش کر غوثِ پاک رحمۃُ اللہِ علیہ کا جنّتُ الفردوس میں پڑوس عطا فرما۔

عذابِ قَبْر کا ایک سَبَب(زَبان کی بے احتیاطی) 

حضرتِ ابُو بکر شِبْلی بغدادی رحمۃُ اللہِ علیہ فرماتے ہیں: میں نے اپنے مرحوم پڑوسی  کو خواب میں دیکھ کر پوچھا: مَا فَعَلَ اللہُ بِكَ؟ یعنی اللہ پاک نے آپ کے ساتھ کیا معاملہ فرمایا؟     وہ بولا: میں خوفناک معاملات سے دو چار ہوا، مُنکَرنکیر کے سُوالات کے جوابات بھی مجھ سے نہیں بَن پڑ رہے تھے، میں نےدِل میں خیال کیا کہ شاید میرا خاتمہ ایمان پر نہیں ہوا ۔ اِ تنے میں آواز آئی: ’’دنیامیں زَبان کے غیرضروری اِستعمال کی وَجہ سے تجھے یہ سزا دی جارہی ہے۔‘‘   اَ ب عذاب کے فَرِشتے میری طر ف بڑھے۔ اتنے میں ایک خوشبو دار و خوب صورت بزرگ میرے اور عذاب کے درمیان حائل ہو(یعنی پردہ بن)گئے اور انہوں نے مجھے مُنکر نکیر کے سوالات کے جوابات یاد دلا دیئے اور میں نے اُسی طرح جوابات دے دیئےتو عذاب مجھ سے دُور  ہو گیا ۔ میں نے اُن بزرگ سے عرض کی: ’’ اللہ پاک آپ پر رَحم فرمائے! آپ کون ہیں؟ فرمایا: میں وہ شخص ہوں جس کو تیرے نبیِ پاک صلی اللہ علیہ واٰلہٖ وسلم   پر کثرت کے ساتھ دُرُود شریف پڑھنے کی برکت سے پیدا کیا گیا ہے اور مجھے ہرمصیبت کے وقت تیری مدد کرنے کیلئے مقرر کیا گیا ہے۔ (القول البدیع، ص260)

سلسلہ ٔ قادِرِیَّہ کی شان 

طریقت میں کئی مشہور بزرگانِ دین رحمۃُ اللہِ علیہم کے سلسلے ہیں مثلاًسلسلۂ قادریہ، چِشْتیہ، نَقْشبندیہ اور سُہروَردیہ وغیرہ۔مگر مولیٰ علی مُشکل کُشا، شیرِ خدا رضی اللہ عنہ سے چلنے والا سیدی و مُرشدی،حضورِ غوثِ اعظم شیخ عبدُ القادر جیلانی رحمۃُ اللہِ علیہ کا قادری سلسلہ اپنی مثال آپ ہے۔اعلیٰ حضرت امام احمد رضا خان رحمۃ اللہ علیہ شانِ غوثِ پاک بیان کرتے ہوئے اپنی نعتیہ کتاب ’’حدائق ِبخشش‘‘ میں  لکھتے ہیں:

 سلسلۂ عالیہ قادریہ کے 13ویں بُزرگ  

سلسلۂ  عالیہ قادریہ عطّاریہ  کے 13 ویں  بُزرگ،حضرت شیخ عبدُ الواحد حنبلی بن عبدُ العزيز  تمیمی  بغدادی رحمۃ اللہ علیہ ہیں ۔آپ اور آپ کے والدِ محترم  حضرت عبدُ العزيز  تمیمی  رحمۃُ اللہِ علیہ اپنے وقت کےعظیم بُزرگ، صوفیِ باصفا اور ولیِ کامل تھے۔شیخ عبدُ الواحد رحمۃُ اللہِ علیہ کی ولادتِ مبارکہ  22 رجبُ المرجب 342 ہجری بروز جمعہ عصر کے وقت یمن میں ہوئی۔ (تاريخ بغداد، 11/15، رقم:5677) والدینِ کرِیْمَیْن کے یمن میں رہنے کے سبب آپ کو یمنی بھی کہا جاتا ہے ، آپ رحمۃُ اللہِ علیہ کی کُنْیَت ابوالفضل اور لقب زَینُ الدّین یعنی دین کی زینت  ہے۔ آپ  کو تمیمی  اِس لئے کہا جاتاہے کہ آپ کا تعلق عرب شریف کے عزت دار قبیلے  بنوتمیم سے تھا یہ وہی  مبارک قبیلہ ہے جس سے مُسلمانوں کے پہلے خلیفہ  حضرتِ ابوبکر صدیق رضی اللہُ عنہ  کا تعلق ہے، بنی تمیم عرب میں اولادِ اسماعیل  سے ہیں اور تمیم اِس قبیلے کے مُورثِ اعلیٰ (یعنی جدِّ اعلیٰ)کا نام ہے۔(مراٰۃ  المناجیح،8/319-320) 

قبیلۂ بنوتمیم کی شان بزبانِ رحمتِ عالمیان صلی اللہ علیہ واٰلہٖ وسلم

یہ قبیلہ کس قدر شان و عظمت والا ہے کہ اللہ پاک کے پیارے پیارے آخری نبی، مکی مَدَ نی ،محمدِ عربی صلی اللہ علیہ واٰلہٖ وسلم   سے قبیلۂ بنو تمیم کے بارے میں پوچھاگیا تو آپ نے ارشاد فرمایا:’’وہ سرخ  ٹیلے یا بڑی بڑی بوندوں والی بارش کی مانندہے۔اِس سے دشمنی کرنے والا اسے نقصان نہیں پہنچاسکتا۔‘‘کچھ لوگوں نےعرض کیا: بنو تمیم کون ہیں؟آپ صلی اللہ علیہ واٰلہٖ وسلم   نے ارشاد فرمایا: اللہ پاک بنو تمیم کے ساتھ صِرف بھلائی کا ارادہ فرماتا ہے،وہ بڑے سروں والے،زیادہ عقل مند، ثابت قدم، دجّال سےشدت کے ساتھ جنگ کرنے والے اور  آخری زمانے میں حق کے مدد گار ہوں گے۔(مسند الحارث، 1/ 942،حدیث:1039)