سورۂ عادِیات کا تعارف

مقامِ نزول:

سورۂ عادِیات حضرت عبد اللّٰہ بن مسعود رَضِیَ اللّٰہُ تَعَالٰی عَنْہُ کے قول کے مطابق مکیہ ہے اور حضرت عبد اللّٰہ بن عباس رَضِیَ اللّٰہُ تَعَالٰی عَنْہُمَا کے قول کے مطابق مدنیہ ہے۔ (خازن، تفسیر سورۃ العادیات، ۴ / ۴۰۲)

رکوع اور آیات کی تعداد:

اس سورت میں 1رکوع، 11آیتیں ہیں ۔

’’عادِیات ‘‘نام رکھنے کی وجہ :

مجاہدین کے ان گھوڑوں کوعادِیات کہتے ہیں جنہیں وہ دشمن کا پیچھا کرنے کیلئے تیزی سے دوڑاتے ہیں ۔اس سورت کی پہلی آیت میں اللّٰہ تعالیٰ نے ان گھوڑوں کی قَسم ارشاد فرمائی ہے اس مناسبت سے اسے ’’سورہ ٔعادِیات‘‘ کہتے ہیں ۔

سورۂ عادِیات کے مضامین:

اس سورت کا مرکزی مضمون یہ ہے کہ اس میں انسان کے ناشکرا ہونے کو بیان کیاگیا ہے اور اس سورت میں یہ مضامین بیان ہوئے ہیں

(1) …اس سورت کی ابتداء میں اللّٰہ تعالیٰ نے مجاہدین کے گھوڑوں کی قسم کھا کر ارشاد فرمایا کہ انسان اپنے رب عَزَّوَجَلَّ کی نعمتوں کی ناشکری اور انکار کرتا ہے اور وہ اپنے اس عمل پر خود بھی گواہ ہے۔

(2) …اس سورت کے آخر میں مال کی محبت میں مضبوط اور اللّٰہ تعالیٰ کی نعمتوں کا شکر ادا کرنے میں کمزور انسان کی مذمت بیان کی گئی اور وہ اعمال کرنے کی ترغیب دی گئی جو قیامت کے دن اللّٰہ تعالیٰ کی بارگاہ میں حساب دیتے وقتکام آئیں گے۔

سورۂ زِلزال کے ساتھ مناسبت:

سورۂ عادِیات کی اپنے سے ما قبل سورت ’’زِلزال‘‘ کے ساتھ مناسبت یہ ہے کہ سورۂ زِلزال کے آخر میں نیکی اور گناہ کی جزا بیان کی گئی اور اس سورت میں اللّٰہ تعالیٰ کی نعمتوں کی ناشکری کرنے،دنیا کو آخر ت پر ترجیح دینے اور آخرت میں لئے جانے والے حساب کی تیاری نہ کرنے پر انسان کی سرزَنِش کی گئی ہے۔