سورۂ اعلیٰ کا تعارف

مقامِ نزول:

سورۂ اعلیٰ مکہ مکرمہ میں نازل ہوئی ہے۔( خازن، تفسیر سورۃ الاعلی، ۴ / ۳۶۹)

رکوع اور آیات کی تعداد:

اس سورت میں1رکوع،19 آیتیں ہیں ۔

’’اعلیٰ ‘‘نام رکھنے کی وجہ :

اعلیٰ کا معنی ہے سب سے بلند،اور اس سورت کی پہلی آیت میں یہ لفظ موجود ہے ،اسی مناسبت سے اسے ’’سورۂ اعلیٰ‘‘ کہتے ہیں ۔

سورۂ اعلیٰ سے متعلق3 اَحادیث :

(1)…حضرت نعمان بن بشیر رَضِیَ اللّٰہُ تَعَالٰی عَنْہُ فرماتے ہیں :حضور پُر نور صَلَّی اللّٰہُ تَعَالٰی عَلَیْہِ وَاٰلِہ وَ سَلَّمَ عید الفطر،عید الاضحی اور جمعہ کی نماز میں ’’سَبِّحِ اسْمَ رَبِّكَ الْاَعْلٰی‘‘ اور ’’هَلْ اَتٰىكَ حَدِیْثُ الْغَاشِیَةِ‘‘ پڑھا کرتے تھے اور جب عید جمعہ کے دن ہوتی تو دونوں نمازوں میں ان سورتوں کی تلاوت فرماتے تھے۔( مسلم، کتاب الجمعۃ، باب ما یقرأ فی صلاۃ الجمعۃ، ص۴۳۵، الحدیث: ۶۲(۸۷۸))

(2)…حضرت عائشہ صدیقہ رَضِیَ اللّٰہُ تَعَالٰی عَنْہَا فرماتی ہیں : نبی کریم صَلَّی اللّٰہُ تَعَالٰی عَلَیْہِ وَاٰلِہ وَ سَلَّمَ وتر کی پہلی رکعت میں ’’سَبِّحِ اسْمَ رَبِّكَ الْاَعْلٰی‘‘ دوسری رکعت میں ’’قُلْ یٰۤاَیُّهَا الْكٰفِرُوْنَ‘‘ اورتیسری رکعت میں ’’قُلْ هُوَ اللّٰهُ اَحَدٌ‘‘ پڑھا کرتے تھے ۔ (ترمذی، کتاب الوتر، باب ما جاء فیما یقرأ بہ فی الوتر، ۲ / ۱۰، الحدیث: ۴۶۲)

(3)…حضرت علی المرتضیٰ کَرَّمَ اللّٰہُ تَعَالٰی وَجْہَہُ الْکَرِیْم فرماتے ہیں ’’نبی کریم صَلَّی اللّٰہُ تَعَالٰی عَلَیْہِ وَاٰلِہ وَ سَلَّمَ اس سورت ’’سَبِّحِ اسْمَ رَبِّكَ الْاَعْلٰی‘‘ سے محبت فرماتے تھے۔( مسند امام احمد، ومن مسند علیّ بن ابی طالب رضی اللّٰہ عنہ، ۱ / ۲۰۶، الحدیث: ۷۴۲)

سورۂ اعلیٰ کے مضامین:

اس سورت کا مرکزی مضمون یہ ہے کہ اس میں اللّٰہ تعالیٰ کی وحدانیَّت اورا س کی قدرت کوثابت کیا گیا ہے اور اس میں یہ مضامین بیان ہوئے ہیں ،

(1)…اس سورت کی ابتداء میں ہر نقص و عیب سے اللّٰہ تعالیٰ کی پاکی بیان کرنے کاحکم دیاگیا اور اللّٰہ تعالیٰ کی قدرت، وحدانیَّت اور علم و حکمت پر دلالت کرنے والے آثار ذکر کئے گئے۔

(2)…یہ بتا یاگیا کہ اللّٰہ تعالیٰ نے اپنے حبیب صَلَّی اللّٰہُ تَعَالٰی عَلَیْہِ وَاٰلِہ وَ سَلَّمَ کے لئے قرآنِ مجید یاد کرنا آسان کر دیا ہے اور آپ صَلَّی اللّٰہُ تَعَالٰی عَلَیْہِ وَاٰلِہ وَ سَلَّمَ اسے کبھی نہیں بھولیں گے۔

(3)… حضورِ اَقدس صَلَّی اللّٰہُ تَعَالٰی عَلَیْہِ وَاٰلِہ وَ سَلَّمَ کو حکم دیا گیا کہ آپ قرآنِ مجید کے ذریعے نصیحت فرمائیں اور یہ بتایا گیا کہ جو اللّٰہ تعالیٰ اور اپنے برے انجام سے ڈرتا ہے وہ نصیحت مانے گا اور جو بڑا بد بخت ہے وہ آپ کی نصیحت قبول کرنے سے دور ہٹے گا۔

(4)…یہ فرمایا گیا کہ جس نے خود کوپاک کرلیا، اللّٰہ تعالیٰ کا نام لے کر نماز ادا کی اور دنیا کی زندگی کو آخرت پر ترجیح نہ دی تو وہ کامیاب ہو گیا۔

(5)…اس سورت کے آخر میں بتایا گیا کہ خود کوپاک کرنے والوں کا اپنی مراد کو پہنچنا اور آخرت کا بہتر ہونا قرآنِ مجید سے پہلے نازل ہونے والے حضرت ابراہیم اور حضرت موسیٰ عَلَیْہِمَا الصَّلٰوۃُ وَالسَّلَام کے صحیفوں میں بھی لکھا ہو اہے۔

سورۂ طارق کے ساتھ مناسبت:

سورۂ اعلیٰ کی اپنے سے ماقبل سورت’’طارق‘‘ کے ساتھ مناسبت یہ ہے کہ دونوں سورتوں میں انسان کی تخلیق اور نباتات سے متعلق کلام کیاگیا ہے۔ (تناسق الدّرر، سورۃ الاعلی، ص۱۳۵-۱۳۶)