محبوب، جس نے اپنے تن پر ایک عالَم کا بار(یعنی بوجھ)اُٹھالیا ، کیسا محبوب،جس نے تمہارے غم میں  دن کاکھانا ، رات کا سونا ترک کردیا۔تم رات دن اس کی نافرمانیوں  میں  مُنہَمِک(یعنی مصروف)اورلَہْو ولَعب(یعنی کھیل کُود) میں  مشغول ہو اوروہ تمہاری بخشش کے لئے شب و روز گِریاں و مَلول(یعنی دن رات روتے اور غمگین رہتے۔)شب(یعنی رات)کہ اللّٰہ کریم نے آسائش(آرام)کے لئے بنائی،صبح قریب ہے، ٹھنڈی نسیموں (یعنی ہواؤں) کا پنکھا ہو رہا ہے،ہر ایک کاجی اس وَقْت آرام کی طرف جھکتاہے ، بادشاہ اپنے گرم بستروں  ، نرم تکیوں  میں  مست خواب ناز(یعنی آرام میں مشغول)ہے اورجو محتاج بے نوا (یعنی بے سہارا) ہے،اس کے بھی پاؤں دو گز کی کملی(چادر)میں  دراز،ایسے سہانے وَقْت،ٹھنڈے زمانہ میں،وہ معصوم،بے گناہ،پاک داماں (پاک دامن) ،عِصمت پناہ(یعنی جس کی پناہ میں پاکدامنی ہو)اپنی راحت وآسائش کوچھوڑ(کر)،خواب وآرام سے منہ موڑ(کر)،جبینِ نیاز(پیشانیِ اقدس کو)آستانَۂ عزت پر(بارگاہِ الٰہی میں)رکھے(ہوئے)ہے کہ الٰہی!میری اُمّت سیاہ کار(گناہگار)ہے،درگزر(یعنی معاف)فرمااوران کے تمام جسموں کو آتشِ دوزخ(دوزخ کی آگ)سے بچا۔( فتاویٰ رضویہ،۳۰/۷۱۶ -۷۱۷ملتقطاً)

صَلُّوْا عَلَی الْحَبِیْب!                                                                                               صَلَّی اللہُ عَلٰی مُحَمَّد

                             اےعاشقانِ رسول!ہم آقا کریم صَلَّی اللہُ عَلَیْہِ واٰلِہٖ وَسَلَّمَ کی اپنی اُمّت سے مَحَبَّت کے بارے میں بیان سُن رہے ہیں۔ غور کریں کہدنیا میں بے شمار ایسے لوگ بستے ہیں جن کا آپس میں پیار  ومَحَبَّت کا رِشتہ قائم ہوتا ہے،مثلاًوالدین اپنی اولادسے مَحَبَّت کرتے ہیں،اولاداپنے والِدَین سے مَحَبَّت کرتی ہے، بہنیں اپنے بھائیوں سے مَحَبَّت کرتی ہیں،دوست اپنے دوستوں سے مَحَبَّت کرتے ہیں،رشتے دار آپس میں ایک دوسرے سے مَحَبَّت کرتے ہیں وغیرہ،مگر یاد رہے!یہ سب محبتیں عارضی ہوتی ہیں،یہ محبتیں فانی ہوتی ہیں ،یہ محبتیں دنیا کی حد تک محدود ہوتی ہیں،اِدھر زندگی کی ڈور کٹی اُدھر محبتوں کے ان تمام سلسلوں کوگویا بریک(Brake) لگ جاتی ہے ۔کچھ ہی عرصے میں بھول کر اپنے اپنے معمولات میں مشغول