سے،اور ایک تہائی پیشاب(کے چھینٹوں سے خود کو نہ بچانے)سے ہوتاہے۔(ذَمُّ الْغِیبَۃلِابْنِ اَبِی الدُّنْیا،ص۹۲ ،رقم:۵۲)افسوس!علمِ دین سے دوری یا سستی کے سبب بعض لوگ پیشاب کر کے پاکی حاصِل نہ کر کے بدن اور کپڑوں وغیرہ کو ناپاک کر لیتے ہیں،اُن کو ڈر جانا چاہئے،اگرپیشاب سے نہ بچنے کے سبب مَعَاذَاللّٰہ،اللہ پاک ناراض ہوگیا، رسول مقبول،بی بی آمنہ کے گلشن کے مہکتے پھول صَلَّی اللّٰہُ عَلَیْہِ واٰلِہٖ وَسَلَّمَ روٹھ گئے تو خدا کی قسم!دنیا وآخرت میں ذِلَّت و رُسوائی مُقَدَّر بن سکتی ہے۔

       آئیے!چغلی کی تعریف سنتی ہیں:چنانچہ

چغلی کسے کہتے ہیں؟

امام نَوَوِیرَحْمَۃُ اللّٰہ عَلَیْہ سےمنقول ہے:کسی کی بات نقصان پہنچانے کے ارادے سے دوسروں کو پہنچانا چُغلی ہے۔ (عمدۃ القاری، تحت الحدیث: ۲۱۶،۲/۵۹۴)

       چغلی کی تعریف یہ ہے کہ لوگوں  کے درمیان فساد ڈالنے کے لئے ایک کی بات دوسرے تک پہنچانا۔(الزواجر عن اقتراف الکبائر، الباب الثانی، الکبیرۃ الثانیۃ والخمسون بعد المأتین: النمیمۃ، ۲/۴۶)

چغل خوری کی تباہ کاریاں

میٹھی میٹھی اسلامی بہنو! معلوم ہوا! کسی کی بات سن کر دوسرے سےاس طور پر کہہ دینا کہ دونوں میں اختلاف اورجھگڑا ہوجائےایسا کرنا چغلی کہلاتاہے۔افسوس صد افسوس!آج ہمارے معاشرےمیں یہ مرض تیزی کے ساتھ عام  ہوتا جارہا ہے۔پہلے کے لوگوں میں احترامِ مسلم کا جذبہ کوٹ کوٹ کر بھرا ہوا تھا اور ہر مسلمان دوسرے مسلمان کی عزت کی حفاظت کرتا تھا مگر آہ! اب ہر طرف نفرتوں کی دیواریں قائم ہوچکی ہیں۔چغلی کی اس تباہ کن بیماری کےسبب اب گھر گھر میدانِ جنگ بنا ہواہے،چنانچہ