اَلْحَمْدُ لِلّٰہِ رَبِّ الْعٰلَمِیْنَ وَ الصَّلٰوۃُ وَالسَّلَامُ علٰی سَیِّدِ الْمُرْسَلِیْنَ ^ط

اَمَّا بَعْدُ فَاَعُوْذُ بِاللّٰہِ مِنَ الشَّیْطٰنِ الرَّجِیْمِ ^ط  بِسْمِ اللہِ الرَّحْمٰنِ الرَّ حِیْم ^ط

اَلصَّلٰوۃُ وَ السَّلَامُ عَلَیْكَ یَا رَسُولَ اللہ                                                                                         وَعَلٰی اٰلِكَ وَ اَصْحٰبِكَ یَا حَبِیْبَ اللہ

اَلصَّلٰوۃُ وَ السَّلَامُ عَلَیْكَ یَا نَبِیَّ اللہ                                                       وَعَلٰی اٰلِكَ وَ اَصْحٰبِكَ یَا نُوْرَ اللہ

نَـوَیْتُ سُنَّتَ الاعْتِکَاف   (ترجَمہ:میں نے سنّتِ اعتکاف کی نیّت کی)

جب بھی مسجد میں داخِل ہوں، یاد آنے پر نفلی اِعْتکاف کی نِیَّت فرما لِیا کریں، جب تک مسجد میں رہیں گے، نفلی اِعْتکاف کا ثواب حاصِل ہوتا رہے گا اور ضِمناً  مسجد میں کھانا، پینا بھی جائز ہو جائے گا۔

دُرُود شَرِیف کی فضیلت

مَنقول ہے : جب کسی مجلس میں (یعنی لوگوں میں )بیٹھوتو یوں کہو:”بِسْمِ اللہِ الرَّحْمٰنِ الرَّ حِیْم وَ صَلَّی اللہُ عَلٰی مُحَمَّد“اللہ عَزَّ  وَجَلَّ  تم پر ایک فِرِشتہ مُقرّر فرمادے گا جو تم کو غیبت سے بازرکھے گااور جب مجلس سے اُٹھو تو کہو:”بِسْمِ اللہِ الرَّحْمٰنِ الرَّ حِیْم وَ صَلَّی اللہُ عَلٰی مُحَمَّد“تو فِرِشتہ  لوگوں کو تمہاری غیبت کرنے سے بازرکھے گا۔^([1])

گرچہ ہیں بے حد قُصُور تم ہو عَفُوّ و غَفور               بخش دو جُرم و خطا تم پہ کرورڑوں دُرود

(حدائقِ بخشش،ص۲۶۶)

شعر کی مختصر وضاحت:

يَارَسُوْلَ الله  صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ!اگرچہ میرے گناہ  بہت زیادہ ہیں،  لیکن آپ  تو بہت  معافی عطافرمانے اور بخش دینے والے ہیں ، میرے گناہ  اور خطاؤں کو معاف   فرمادیجئے،اللہ عَزَّ  وَجَلَّ  آپ پر  کروڑوں  درود و سلام  نازل فرمائے ۔