وضاحت:اعلیٰ حضرت رَحمۃُ اللہ عَلَیْہ کا جوشِ عشق دیکھئے! فرما رہے ہیں: اے رضاؔ روزِ قیامت میں عشقِ رسول اور وارفتگی و محبّت کے مزے لُوٹوں گا، جب پیارے آقا، مکی مدنی مصطفےٰ صَلَّی اللہ عَلَیْہِ وَ آلِہٖ وَ سَلَّم  کا دامنِ کرم ہاتھ آئے گا تو عشق و محبّت میں لوٹ پَوٹ ہو (یعنی مچل) جاؤں گا۔

اللہ پاک ہمیں میدانِ محشر میں بلکہ دُنیا میں، نَزْع میں، قبر میں، حشر میں، میزان پر، پُل صراط پر، ہر ہر مَقام پر دامنِ مصطفےٰ صَلَّی اللہ عَلَیْہِ وَ آلِہٖ وَ سَلَّم    کی ٹھنڈی چھائیں نصیب فرمائے۔ آمِیْن بِجَاہِ خَاتَمِ النَّبِیّٖن صَلَّی اللہ عَلَیْہِ وَ آلِہٖ وَ سَلَّم۔

نَزْع میں، گور میں، میزاں پہ، سرِ پُل پہ، کہیں          نہ چھٹے ہاتھ سے دامانِ مُعلّٰی تیرا

کس کا مُنہ تکیے! کہاں جائیے! کس سے کہیے!             تیرے   ہی   قدموں   پہ   مِٹ   جائے    یہ   پالا   تیرا ^([1])

صَلُّوْا عَلَی الْحَبیب!                                               صَلَّی اللہ عَلٰی مُحَمَّد

بیان سننے کی نیتیں

حدیثِ پاک میں ہے: اِنَّمَا الْاَعْمَالُ بِالنِّیَّات اَعْمَال کا دار ومدار نیتوں پر ہے۔^([2])

پیارے اسلامی بھائیو! اچھی نیت بندے کو جنّت میں پہنچا دیتی ہے، بیان سننے سے پہلے کچھ اچھی اچھی نیتیں کر لیجئے! مثلاً نیت کیجئے: * رِضَائے اِلٰہی کے لئےپورا بیان سُنوں گا * عِلْمِ دین سیکھوں گا * ادب سے بیٹھوں گا * نصیحت حاصِل کروں گا * اَحْمَدِ مجتبیٰ، مُحَمَّدِ مصطفےٰ صلی اللہ عَلَیْہِ وَ آلِہٖ وَسَلَّم کا نامِ پاک سُن کر درودِ پاک پڑھوں گا۔

صَلُّوْا عَلَی الْحَبِیْب!                                               صَلَّی اللہ عَلٰی مُحَمَّد

پیارے اسلامی بھائیو! آج ایک نِرالا، انوکھا اور ایمان افروز موضوع لے کر حاضِر ہوں،