عرش سے فرش تک جگمگانے لگا                  رشکِ صبحِ صفا آج کی رات ہے

عطرِ رحمت فرشتے چھڑکتے چلے                  جس کی خوشبو سے رستے مہکتے چلے

چاند تارے جِلو میں چمکتے چلے                    کہکشاں زیرِ پا آج کی رات ہے

طُور پر رفعتِ لامکانی کہاں                      لَن تَرانی کہاں مَنْ رّاٰنی کہاں

جس کا سایہ نہیں اُس کا ثانی کہاں                 اُن کا اِک معجزہ آج کی رات ہے

جذبِ حسنِ طلب ہر قدم ساتھ ہے              دائیں بائیں فرشتوں کی بارات ہے

سرپہ نورانی سہرے کی کیا بات ہے               شاہ دُولہا بنا آج کی رات ہے

صَلُّو ْا عَلَی الْحَبِیْب!                                            صَلَّی اللہُ تَعَالٰی عَلٰی مُحَمَّد

تَبَارَکَ اللہُ شان تیری!      

میٹھے میٹھے اسلامی بھائیو!آج کی رات اللہعَزَّ  وَجَلَّ  نے سرورِکائنات ،شاہِ موجودات صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ کو اپنے دیدار سے مُشرَّف فرمایا،جس کی طلب حضرتِ سیِّدُنا مُوسیٰ کَلِیْمُ اللہ عَلٰی نَبِیِّنا وَعَلَیْہِ  الصَّلٰوۃُ وَالسَّلام کے دل کی دھڑکن بنی رہی، حتّٰی کہ یہی آرزُو اِلتجاء بن کرحضرت مُوسیٰ عَلَیْہِ السَّلَام  کے مُبارَک لَبوں پر آگئی اور  بارگاہِ الٰہی  میں عَرْض کی: ’’رَبِّ اَرِنِیْ،اے رَبّ میرے مجھے اپنا دیدار دِکھا ! ‘‘ رَبّ عَزَّ  وَجَلَّ نے اِرْشاد فرمایا:’’لَنْ تَرٰنِیْ تُو مجھے ہرگز نہ دیکھ سکے گا ۔‘‘ مگر جب بات اپنے پیارے حبیب صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ کی آئی توخُود حضرت جبریل عَلَیْہِ السَّلَام کو بھیج کر محبوب کو بلوایااور اپنے دِیدار سے مُسْتَفِیْض فرمایا، جبھی تو عاشقِ ماہِ رسالت،اِمام احمد رضاخان رَحْمَۃُ اللّٰہ ِتَعَالٰی عَلَیْہ  نے کیا خُوب ارشاد فرمایا:

تَبَارَکَ اللہ شان تیری تجھی کو زیبا ہے بے نیازی

کہیں تو وہ جوشِ لَنْ تَرانِیْ کہیں تَقاضے وِصال کے تھے