رِیاکاری کا دوسرا عِلاج یہ ہے کہ ہم  اِس کی آفتوں کو پیشِ نظر رکھیں کیونکہ آدمی کا دل کسی چیز کواُس وَقْت تک ہی پسند کرتا ہے جب تک وہ اُسے نَفْع بخش اورلذیذ نظر آتی ہے مگر جب اُسےاُس  شے کے نُقصان دہ ہونے کا پتہ چلتاہے تو وہ اُس سے بچتا ہے مثلاً ایک اسلامی بھائی شہد کو اس کی لذّت اور مِٹھاس کی وَجہ سے بَہُت پسندکرتا ہے لیکن اگر اُسے یہ بتادِیا جائے کہ یہ شہد جسے تم پینے جارہے ہو،اِس میں زہر مِلاہوا ہے تو وہ اُس میں مَوْجُود  مِٹھاس کو نہیں زہرکو دیکھے گا اور اسے ہرگزہرگز نہیں پیئے گا ۔ اِسی طرح لوگوں پر اپنا نیک عمل ظاہِر کرنے اور ان کی طرف سے واہ واہ ہونے میں یقیناً نَفْس کو بڑی لذّت ملتی ہے لیکن اگر ہم اِس لذّت کے بجائے رِیاکاری کے نُقصانات ذِہْن میں رکھیں تو اس سے بچنا ہمارے لئے قدرے آسان ہوجائے گا  اور ہمارا یہ ذہن بنے گا کہ لوگوں کی ایسی واہ واہ ہمارے کسی کام کی نہیں ،جس کی وجہ سے ہماری محنت اور کئے کرائے پر پانی پھر جائے۔ (نیکی کی دعوت ،ص۸۴ ملخصاً)

(3)رِیاکے اَسْباب کا خاتِمہ کیجئے

مرضِ رِیا کا تیسرا عِلاج اس مرض کے اَسْباب کا خاتمہ ہے۔کیونکہ ہر بیماری کا کوئی نہ کوئی سبب ہوتا ہے اگر سبب مٹادِیا جائے تو بیماری بھی رُخْصت ہوجاتی ہے۔اِسی طرح رِیاکاری کے بھی بُنیادی طور پر 3 اَسباب ہیں،اگراِن تینوں سےجان چُھڑا لی جائےتواِنْ شَآءَاللہعَزَّ  وَجَلَّ رِیاکاری سے بچنا بے حدآسان ہوجائے گا۔وہ 3 اسباب یہ ہیں:(۱)حُبِّ جاہ یعنی شُہرت کی خواہِش(۲)مَذَمَّت کا خوف اور(۳)مال ودولت کی حِرص۔ (نیکی کی دعوت ص۸۶)

صَلُّوْا عَلَی الْحَبِیْب!                                  صَلَّی اللّٰہُ تَعَالٰی عَلٰی مُحَمَّد

(4)اپنے اعمال میں اِخلاص پیدا کیجئے