ان ازواجِ مُطَہَّرات میں حضرت اُمِّ سلمہ     رَضِیَ اللہُ عَنْہا   بھی ہیں ، جن کی علمِ دین میں مَہارت کا حال یہ تھا کہ آپ کو فقہا یعنی شرعی اَحْکام و قوانین کی ماہر صحابیات میں شُمار کیا جاتا تھا۔ ^([1])

ان ازواجِ مُطَہَّرات میں حضرت زَینب بنتِ جَحْش     رَضِیَ اللہُ عَنْہا   بھی ہیں ، ان کے خُشُوع و خُضُوع کاحال یہ تھا کہ رَسُولُاللہ   صَلَّی اللّٰہُ عَلَیْہِ واٰلِہٖ وَسَلَّمَ   نے ان کے خُشُوع و خُضُوع کےمُتَعلِّق ارشادفرمایا : زَینب بنتِ جَحْش(    رَضِیَ اللہُ عَنْہا  ) خُشُوع اختیار کرنے والی اور رَبّ کے حضور گِڑگِڑانے والی ہے۔ ^([2]) حضرت بی بی زَینب بنت جَحْش کی عادت تھی کہ جو کچھ اپنے ہاتھ سے کماتیں وہ سب فقرا ومساکین کو دے دیا کرتی تھیں اور صرف اسی لئے محنت و مشقّت کرتی تھیں کہ فقیروں اور محتاجوں کی اِمداد کریں۔ ^([3])

                             ان ازواجِ مُطَہَّرات میں حضرت جُوَیْرِیہ     رَضِیَ اللہُ عَنْہا   بھی ہیں جو بڑی عبادت گُزار اور دین دار خاتون تھیں ، نمازِ فجر پڑھ لینے کے بعد سے نمازِ چاشت تک اَوراد و وظائف میں مصروف رہتی تھیں۔ ^([4])

                             ان ازواجِ مُطَہَّرات میں حضرت اُمِّ حبیبہ    رَضِیَ اللہُ عَنْہا  بھی ہیں ، یہ بہت سی حدیثوں کی حافظہ تھیں ، بڑی عبادت گُزار اور نیکوکار خاتون تھیں۔ ^([5])

                             ان ازواجِ مُطَہَّرات میں حضرت صَفِیّہ    رَضِیَ اللہُ عَنْہا   بھی ہیں ، یہ بھی اُن بے مثال خواتین میں شامل ہیں جو عبادت ، تقویٰ و پرہیز گاری اورصدقہ کرنے کے اعتبار سے تمام عورتوں کی سردار ہیں۔ ^([6])

                             ان ازواجِ مُطَہَّرات میں حضرت میمونہ     رَضِیَ اللہُ عَنْہا   بھی ہیں ، یہ بھی بڑی پرہیزگار اور سُنّتوں پرعمل کرنے والی خاتون تھیں ،  مِسواک سے مَحَبّت کا عالم یہ تھا کہ جب کسی اور کام میں مشغول نہ ہوتیں تو مِسواک کرنے لگ جاتیں۔ ^([7])