بات کرتے دیکھایا سُنا،(تو)آپ صَلَّی اللہُ  عَلَیْہِ واٰلِہٖ وَسَلَّمَ مُسکراتے تھے۔‘‘(لہٰذا میں بھی اسی سُنَّت پر عمل کی نِیَّت سے ایسا کرتا ہوں) ۔(مسند احمد،مسند الانصار، باقی حدیث ابی الدرداء رضی اللہ عنہ، ۸/۱۷۱، حدیث: ۲۱۷۹۱)

سرکارصَلَّی اللہُ  عَلَیْہِ واٰلِہٖ وَسَلَّمَ کی پسند اپنی پسند

حضرت  اَنَس بن مالک  رَضِیَ اللہُ  عَنْہُ سے مروی ہے کہ ایک دَرْزی نے رَسُوْلُ اللہ صَلَّی اللہُ  عَلَیْہِ واٰلِہٖ وَسَلَّمَ کی دعوت کی،(حضرت  اَنَس رَضِیَ اللہُ  عَنْہُ فرماتے ہیں:)آپ صَلَّی اللہُ  عَلَیْہِ واٰلِہٖ وَسَلَّمَکے ساتھ میں بھی دعوت میں شریک ہوگیا، دَرْزی نے حضور کے سامنے روٹی، کدّو (یعنی لوکی شریف)اورگوشت کا سالَن رکھا۔ میں نے دیکھا نبیِّ کریم صَلَّی اللہُ  عَلَیْہِ واٰلِہٖ وَسَلَّمَ برتن سے کدّو شریف تلاش کر کے تَناوُل فرمارہے ہیں (اس کے بعدآپ رَضِیَ اللہُ  عَنْہُ اپنا عمل بتاتے ہوئے فرماتے ہیں:)فَلَمْ اَ زَلْ اُحِبُّ الدُّبَّاءَمِنْ یَوْمِئِذٍ یعنی اس دن کے بعد سے میں کدّو شریف کو پسند کرتا ہوں۔ (بخاری، کتاب البیوع ،باب ذکر الخیاط،۲/۱۷، حدیث: ۲۰۹۲)

سُبْحٰنَ اللہ!صحابۂ کرام عَلَیْہِمُ الرِّضْوَان  میں نبیِّ کریم صَلَّی اللہُ  عَلَیْہِ واٰلِہٖ وَسَلَّمَ کی پیروی کا کیسا جذبہ تھااور یہ حضرات آپ صَلَّی اللہُ  عَلَیْہِ واٰلِہٖ وَسَلَّمَ کی ہر اَداکو اَپنانے کاکیسا شوق رکھتےتھے،ان کی رسولِ مقبول، بی بی آمنہ کے مہکتے پھول صَلَّی اللہُ  عَلَیْہِ واٰلِہٖ وَسَلَّمَ سے محبت کا عالم تو دیکھئے کہ رسولِ خدا صَلَّی اللہُ  عَلَیْہِ واٰلِہٖ وَسَلَّمَ جس چیز کو پسند فرماتے  یہ حضرات بھی اسی چیز کو اپنی پسند کا حصہ بنالیا کرتے،پھرسرکار صَلَّی اللہُ  عَلَیْہِ واٰلِہٖ وَسَلَّمَ جس چیز کاحکم فرمایا کرتے، تو اس میں اِطاعت کا کیاعالَم ہوگا۔آئیے!اس ضمن میں صحابۂ کرام عَلَیْہِمُ الرِّضْوَان کی اطاعتِ رسول سے مُتَعَلِّق چندپیارے پیارےواقعات سُنتے ہیں ۔

حضرت عائشہ رَضِیَ اللہُ  عَنْہا  کا فرمانِ رسول پر عمل :

ایک بار اُمُّ الْمُومنین  حضرت  عائشہ صِدّیقہ رَضِیَ اللہُ  عَنْہا کے پاس ایک سائل(یعنی فقیر) آیا، آپ رَضِیَ اللہُ  عَنْہا نے اُسے  روٹی کاایک ٹکڑا عطافرمادیا ، پھرایک خُوش لباس شخص آیا تو آپ رَضِیَ اللہُ  عَنْہا  نے اسے  بٹھا کرکھانا کھلایا۔لوگوں نے اس فَرق کی وجہ پُوچھی تو آپ رَضِیَ اللہُ  عَنْہانے ارشادفرمایا: