آئیے! اب شیخِ طریقت، اَمِیْرِ اَہلسنّت، بانیِ دعوتِ اسلامی حضرت علّامہ مولانا ابو بلال محمد الیاس عطّار قادِری رَضَوِی ضِیائی دَامَتْ بَـرَکاتُہُمُ الْعَالِیَہ   کے سفرِ ِمدینہ کے پُر کیف و نِرالے انداز کے بارے میں سُنتے ہیں کیونکہ بِلَاشُبہ آپ دَامَتْ بَـرَکاتُہُمُ الْعَالِیَہ  بھی عشقِ رسول کے ایسے دَرَجے پر فائز ہیں کہ جس کی وجہ سے آپ دَامَتْ بَـرَکاتُہُمُ الْعَالِیَہ   کا شُمار بھی عاشقانِ رسول کی صَفِ اَوّل میں ہوتا ہے، اَمِیْرِ اَہلسنّت کے سفرِِ مدینہ کے اَحوال سُن کر یقیناً ہمیں بَہُت  کچھ سیکھنے کو ملے گا،

اَمِیْرِ اَہلسُنّت دَامَتْ بَـرَکاتُہُمُ الْعَالِیَہ  کا سفرِِ مدینہ

شیخِ طریقت، اَمِیْرِ اَہلسنّت، بانیِ دعوتِ اسلامی حضرت علّامہ مولانا ابو بلال محمد الیاس عطّار قادِری رَضَوِی ضِیائی دَامَتْ بَـرَکاتُہُمُ الْعَالِیَہ   کو کئی مرتبہ سَفَرِِ حج و سَفَرِ مدینہ کی سعادت حاصِل ہوئی ،جن میں مجموعی طور پر جو کَیْفیَّت رہی اُسے کَمَا حَـقُّہٗ تو بَیان  نہیں کِیا جاسکتا البَتَّہ آپ دَامَتْ بَـرَکاتُہُمُ الْعَالِیَہ  کے ایک سَفَرِ مدینہ کے مُخْتَصَر اَحوال سُنتےہیں چنانچِہ جب مدینۂ پاک زَادَہَا اللّٰہُ شَرَفًاوَّتَعْظِیْماً  کی طرف آپ دَامَتْ بَـرَکاتُہُمُ الْعَالِیَہ   کی روانگی کی مبارَک گھڑی آئی تو ائیر پورٹ پر عاشقانِ رسول کا ایک جَمِّ غَفِیر (بَہُت  بڑا ہُجوم)آپ کو اَلوَداع کہنے کے لئے مَوجود تھا،مدینے کے دیوانوں نے آپ دَامَتْ بَـرَکاتُہُمُ الْعَالِیَہ   کو جُھرمَٹ(حلقے) میں لے کر نعتیں پڑھنا شروع کردیں۔سوزوگُدازمیں ڈُوبی ہوئی نعتوں نے عُشّاق کی آتش ِعشق کو مزید بَھڑکا دیا۔ غمِ مدینہ میں اُٹھنے والی آہوں اور سِسْکیوں سے فَضا سوگْوار ہوئی جارہی تھی،خود عاشقِ مدینہ،اَمِیْرِ اَہلسنّت دَامَتْ بَـرَکاتُہُمُ الْعَالِیَہکی کَیْفیَّت بڑی عجیب تھی۔ آپ دَامَتْ بَـرَکاتُہُمُ الْعَالِیَہکی آنکھوں سے آنسوؤں کی جَھڑی لگی ہوئی تھی اورآپ دَامَتْ بَـرَکاتُہُمُ الْعَالِیَہ اپنے اِن اَشْعار کے مِصْداق نَظَر آرہے تھے