ھَیْھَاتَ لَااَدْرِی افسوس! افسوس! مجھے کچھ نہیں معلوم ۔پھراسے بھی وہی حسین و جمیل نُور برساتا جلوہ دِکھایا جائے گا اور سُوال ہوگا ، مَاکُنْتَ تَقُوْلُ فِیْ ھٰذَا الرَّجُل اِن کے بارے میں تُو کیا کہتا تھا؟ اس وقت پہچان کیسے ہوگی! داڑھی سے تو اُنْسِیَّت تھی ہی نہیں،غیروں  کا طریقہ ہی عزیز تھا، زندگی بھر داڑھی مُنڈانے کا معمول رہا تھا ، یہ تو داڑھی شریف والی شخصیَّت ہےاور کبھی زندَگی میں عِمامے کا سوچا بھی نہیں تھا ،یہ تشریف لانے والے بزرگ تو سرپر عمامہ شریف سجائے ہوئے خمدار   مُعَنْبری زلفوں والے ہیں۔مجھے توفنکاروں اور گُلوکاروں کی پہچان تھی،نجانے یہ کون صاحِب ہیں ؟ آہ ! جس کا خاتمہ ایمان پر نہیں ہُوا ، اس کے منہ سے نکلے گا، ھَیْھَاتَ ھَیْھَاتَ لَااَدْرِی افسوس! افسوس! مجھے کچھ نہیں معلوم ۔اتنے میں جنّت کی کِھڑکی کُھلے گی اور فوراً بند ہوجائے گی پھرجہنّم کی کھِڑکی کُھلے گی اور کہا جائے گا اگرتُونے دُرُست جواب دیئے ہوتے تو تیرے لئے وہ جنّت کی کھِڑکی تھی ۔ یہ سُن کراُسے حسرت بالائے حسرت ہوگی، کفن کو آگ کے کفن سے تبدیل کردیا جائے گا ، آگ کا بچھونا قبر میں بچھا دیا جائیگا، سانپ اور بچھّو لپٹ جائیں گے۔

تُوْبُوْااِلَی اللہ                                 اَسْتَغْفِرُاللہ

صَلُّوْا عَلَی الْحَبِیْب!                                        صَلَّی اللّٰہُ تَعَالٰی عَلٰی مُحَمَّد

ڈنک مچھر کا سَہا جاتا نہیں کیسے میں پھر                              قبر میں بچھّو کے ڈنک آہ سَہوں گا یاربّ!

گُھپ اندھیرے کا بھی وَحشت کا بسیرا ہوگا                                   قبر میں کیسے اکیلا میں رہوں گا یاربّ!

قبر محبوب کے جلووں سے بسا دے مالک                                                یہ کرم کر دے تو میں شاد رہوں گا یاربّ!

(وسائلِ بخشش  مرمم،ص۸۴)