Mujhe bakhsh day bay sabab ya Ilahi

مجھے بخش دے بے سبب یا الٰہی

مجھے بخش دے بے سبب یاالٰہی

نہ کرنا کبھی بھی غضب یاالٰہی

پئے شاہِ بَطْحا  مِری چھوٹ جائیں

بُری عادتیں سب کی سب یاالٰہی

میں مکے میں آؤں مدینے میں آؤں

بنا کوئی ایسا سبَب یاالٰہی

دکھا دے بہارِ مدینہ دکھادے

پئے تاجدارِ عرب یاالٰہی

حُسین ابنِ حیدر کے صَدْقے میں مولیٰ

ٹَلیں آفتیں میری سب یاالٰہی

نظر میں محمد کے جلوے بسے ہوں

چلوں اس جہاں سے میں جب یاالٰہی

گناہوں سے عطّار کو دے مُعافی

کرم کر، نہ کرنا غضب یاالٰہی

وسائلِ بخشش مرمم،ص107

از شیخِ طریقت امیرِ اہلِ سنت دَامَتْ بَرَکاتُہُمُ الْعَالِیَہ

تمہیں نے تو کیا ہم کو مسلماں یارسولَ اللہ

تُمہیں نے تو کیا ہم کو مسلماں یارسولَ اللہ

تمہیں تو ہو ہمارا دین و ایماں یارسولَ اللہ

نہ بھولے اور نہ بھولے گے قیامت تک غلاموں کو

نہ کیوں ہوں اہلسنت تم پہ قرباں یارسولَ اللہ

فقط یہ آرزو ہے نَزْع میں مَرْقَد میں محشر میں

کہیں ہم سےنہ چُھوٹےتیراداماں یارسولَ اللہ

مریضانِ جہاں کو تم شفا دیتے ہو دم بھر میں

خُدارا  درد  کا  ہو  میرے  دَرْماں  یارسولَ اللہ

بنایا ہے خدا نے دونوں عالم کا تجھے حاکم

سروں پر لیتے ہیں سب تیرا فرماں یارسولَ اللہ

خدا کے بعد افضل جاننا تم کو دو عالم سے

یہی تو ہے ہمارا دین و ایماں یارسولَ اللہ

جمیلِ قادری کی دو جہاں میں لاج رکھ لینا

طفیلِ حضرت احمد رضا خاں یارسولَ اللہ

قبالۂ بخشش،ص127

از مداح الحبیب مولانا جمیل الرحمن قادری رضوی عَلَیْہِ رَحمَۃُ اللّٰہ ِالْقَوِی

بہتری جس پہ کرے فخر وہ بہتر صدیق

بہتری جس پہ کرے فَخْر وہ بہتر صدّیق

سَرْوَرِی جس پہ کرے ناز و سرور صدّیق

سارے اصحابِ نبی تارے ہیں امّت کے لئے

ان ستاروں میں بنے مَہْرِ مُنَوّر صدّیق

ان کے مدّاح نبی ان کا ثنا گَو اللہ

حَقْ اَبُوالْفَضْل کہے اور پیغمبر صدّیق

بال بچوں کے لئے گھر میں خدا کو چھوڑیں

مصطفےٰ  پر کریں گھر بار نِچھاور صدّیق

ایک گھر بار تو کیا غار میں جاں بھی دیدیں

سانپ ڈستا رہے لیکن نہ ہوں مُضْطرْ صدّیق

کہیں گِرتوں کو سنبھالیں کہیں رُوٹھوں کو منائیں

کھودیں اِلْحاد کی جَڑْ بعدِ پیغمبر  صدّیق

تو ہے آزاد سَقَر^([1]) سے ترے بندے آزاد

ہے یہ سالک بھی ترا بندۂ^([2]) بے زَرْ صدّیق

دیوانِ سالک، ص26

ازمفتی احمد یار خان علیہ رحمۃ الرحمن