گُناہ بےعدد اور جُرم بھی ہیں لاتعداد        معاف کر دے نہ سہ پاؤں گا سزا یارَبّ !  ^([1])

صَلُّوْا عَلَی الْحَبیب !                                                                   صَلَّی اللّٰہُ عَلٰی مُحَمَّد

گنہگار کے ناکارہ دلائل

وعظ ونصیحت کی کتابوں میں لکھا ہے :  روزِ قیامت ایک شخص کو اُس کا اعمال نامہ دیا جائے گا ،  وہ عَرْض کرے گا :  مولیٰ !  اس میں جو کچھ لکھا ہے ،  میں نے یہ نہیں کیا ،  اس پر کِراماً کاتبین (یعنی اَعْمَال لکھنے والے فرشتوں) کو لایا جائے گا،  بندہ عَرْض کرے گا :  مولیٰ !  یہ فرشتے ہیں ،  یہ تیرے حکم کے پابند ہیں ،  میں وہی گواہ قبول کروں گا جو مجھ سے ہوں۔ اللہ پاک اس بندے کی زبان کو حکم دے گا :  میری قُدْرت سے بول !  اور حق کے سِوا کچھ مت کہنا۔ بندے کی زبان اُس کے تمام اچھے بُرے اَعْمَال بیان کر دے گی۔ بندہ پھر عَرْض کرے گا :  مولیٰ !  یہ زبان ہی تو ہے جو اَکْثَر گُنَاہ کرواتی ہے ،  یہ تو ویسے ہی میری دُشمن ہے ،  میرے خِلاف میرے دُشمن کی گواہی کیسے معتبر ہو سکتی ہے ؟  

اب اللہ پاک بندے کے ہاتھوں کو حکم فرمائے گا :  اِنْطِقَا بِمَافَعَلَ عَبْدِی یعنی(اے اس بندے کے ہاتھو ! ) بتاؤ میرے بندے نے کیا  کیا عَمَل کئے ہیں ؟  اس کے ہاتھ سب کچھ سچ سچ بیان کر دیں گے۔ بندہ پھر عَرْض کرے گا :  مولیٰ !  یہ دونوں ہاتھ مِل کر ایک گواہ ہے ،  دوسرا گواہ ابھی باقی ہے۔ اللہ پاک اس کے پاؤں کو فرمائے گا :  تم کیا کہتے ہو؟  میرے بندے نے جو کچھ کیا ،  اس کی سچ سچ گواہی دو... ! ! اب اس کے پاؤں بھی اس کے خِلاف گواہی دیں گے۔