Hamare Dil Ke Aaine Mein Hai Naqsha Muhammad Ka

حمد ونعت

 ماہنامہ ربیع الآخر1442ھ

اَلْحَمْدُ لِلّٰہِ رَبِّ الْعٰلَمِیْنَ وَالصَّلٰوۃُ وَالسَّلَامُ عَلٰی سَیِّدِ الْمُرْسَلِیْن ^ط اَمَّا بَعْدُ! فَاَعُوْذُ بِاللّٰہِ مِنَ الشَّیْطٰنِ الرَّجِیْم ^ط بِسْمِ اللّٰہِ الرَّحْمٰنِ الرَّحِیْم ^ط

فرمانِ مصطفےٰ  صلَّی اللہ علیہ واٰلہٖ وسلَّم  ہے :

جس نے قر اٰنِ پاک پڑھا ، ربّ تعالیٰ کی حمد کی اور نبی ( صلَّی اللہ علیہ واٰلہٖ وسلَّم ) پر دُرود شریف پڑھا نیز اپنے ربّ سے مغفرت طلب کی تو اُس نے بھلائی اُس کی جگہ سے تلاش کر لی۔ (شعب الایمان ، 2 / 373 ، حدیث : 2048)

نعت

ہمارے دل کے آئینہ میں ہے نقشہ محمد کا

ہماری آنکھ کی پُتلی میں ہے جلوہ محمد کا

غلامانِ محمد کے سروں سے بارِ عصیاں کو

اُڑا لے جائے گا اک آن میں جھونکا محمد کا

نِدا ہوگی یہ محشر میں گنہگارو نہ گھبراؤ

وہ دیکھو ابرِ رحمت جھوم کر اُٹھا محمد کا

خدا کے سامنے پیشی ہوئی جس دَم تو کہہ دوں گا

بُرا ہوں یا بھلا لیکن ہوں میں بندہ محمد کا

الٰہی اس تنِ خاکی میں جب تک جان باقی ہے

رہے دل میں اَحد اور وردِ لَب کلِمہ محمد کا

نہیں موقوف کچھ اُن کی عطا اس ایک عالَم پر

ملے گا حشر میں بھی دیکھنا صدقہ محمد کا

جمیلِؔ قادری مشکل ہے مِدحت ختم کر اس پر

کہ حق کے بعد بَالا سب سے ہے رُتبہ محمد کا

قبالۂ بخشش ، ص54

از   مَدَّاحُ الْحَبِیْب مولانا جمیل الرحمٰن قادری رضوی رحمۃ اللہ علیہ

منقبت

ہاتھ پکڑا ہے تو تاحشر نبھانا یاغوث

اب کسی حال میں دامن نہ چھڑانا یاغوث

اپنے ہی کوچے میں سرشارِ تمنا رکھنا

اپنے محتاج کو در در نہ پھرانا یاغوث

تیرے نانا کی سخاوت کی قسم ہے تجھ کو

اپنے در سے ہمیں خالی نہ پھرانا یاغوث

آستیں اپنی بڑھانا مری پلکوں کی طرف

اپنے غم میں ہمیں جب جب بھی رلانا یاغوث

کبھی آنکھوں میں کبھی خانۂ دل میں رہنا

روح بن کر مری رگ رگ میں سمانا یاغوث

نسبتِ حلقہ بدوشی کا بھرم رکھ لینا

بَہرِ امداد مری قبر میں آنا یاغوث

کسی منجدھار سے ارشدؔ کی صدا آتی ہے

میری کشتی کو تم ہی پار لگانا یاغوث

اظہارِ عقیدت ، ص75

از حضرت علامہ مولانا ارشد القادری رحمۃ اللہ علیہ

مشکل الفاظ کے معانی : بارِ عصیاں : گناہوں کا بوجھ۔ بندہ : غلام۔ مِدحت : تعریف۔ حق : (مرادی معنی) اللہ پاک۔ بالا : بلند۔ نسبتِ حلقہ بدوشی : (مرادی معنی) مرید ہونے کی نسبت۔ بَہرِ امداد : مدد کرنے کے لئے۔