فرمانِ مصطفےٰ صَلّی اللہُ عَلَیْہ وآلِہ وسَلَّم : اَفْضَلُ الْعَمَلِ اَلنِّيَّۃُ الصَّادِقَۃُ سچی نیت سب سے افضل عمل ہے۔  ⁽ [1] ⁾  اے عاشقانِ رسول ! ہر کام سے پہلے اچھی اچھی نیتیں کرنے کی عادت بنائیے کہ اچھی نیت بندے کو جنت میں داخِل کر دیتی ہے۔ بیان سننے سے پہلے بھی اچھی اچھی نیتیں کر لیجئے ! مثلاً نیت کیجئے ! * عِلْم سیکھنے کے لئے پورا بیان سُنوں گا * با اَدب بیٹھوں گا * دورانِ بیان سُستی سے بچوں گا  * اپنی اِصْلاح کے لئے بیان سُنوں گا  * جو سُنوں گا دوسروں تک پہنچانے  کی کوشش کروں گا۔

صَلُّوْا عَلَی الْحَبِیْب !                                            صَلَّی اللہُ عَلٰی مُحَمّد

کیابیماری بذاتِ خُود  دَوا  بن سکتی ہے ؟

 ” عُیُونُ الحکایات “ جلد1 ، صفحہ 367 پر ہے : سلسلۂ قادِریہ رَضَوِیہ کےمشہوربُزرگ حضرت ابُوقاسم جُنیدبغدادی رَحْمَۃُ اللّٰہ ِعَلَیْہِ   فرماتے ہیں : ایک رات مجھے بڑی بے چینی ہوئی۔ میں عبادتِ الٰہی میں مشغول رہا لیکن مجھے سُکون نہیں مل رہا تھا۔ میں نے خُوب کوشش کی کہ عبادت میں یکسوئی   ( Full Attention ) اورخُشُوع وخُضُوع حاصل ہوجائے لیکن میں اس کوشِش میں کامیاب نہ ہوسکا۔ پھر میں نے قرآنِ پاک کی تِلاوت شُرو ع کردی لیکن مجھے پھر بھی یکسوئی ( Full Attention )  اوردِلی سُکون حاصل نہ ہوا۔میں بہت حیران تھاکہ آخر آج ایسی کیا بات ہے کہ مجھے عبادتِ الٰہی  میں یکسوئی حاصل نہیں ہورہی او رمیرا سُکون مجھ سے دُور ہو گیا ہے ۔آخر کار رات کے آخری حصے میں ، میں نے اپنی چادَر کَندھے پر ڈالی اورگھر سے باہر نکل آیا۔ کچھ دُور جاکر راستے میں مجھے ایک شخص نظر آیا ، جو چادَرمیں لپٹا ہوا تھا۔