Book Name:Karbala Walon Ke Kareemana Andaz
صَلُّوْا عَلَی الْحَبِیْب! صَلَّی اللہُ عَلٰی مُحَمَّد
فرمانِ مصطفےٰ صَلّی اللہُ عَلَیْہ وآلِہ وسَلَّم:اَفْضَلُ الْعَمَلِ اَلنِّيَّۃُ الصَّادِقَۃُ سچی نیت سب سے افضل عمل ہے۔ ([1]) اے عاشقانِ رسول! ہر کام سے پہلے اچھی اچھی نیتیں کرنے کی عادت بنائیے کہ اچھی نیت بندے کو جنت میں داخِل کر دیتی ہے۔ بیان سننے سے پہلے بھی اچھی اچھی نیتیں کر لیجئے! مثلاً نیت کیجئے! *عِلْم سیکھنے کے لئے پورا بیان سُنوں گا * با اَدب بیٹھوں گا *دورانِ بیان سُستی سے بچوں گا *اپنی اِصْلاح کے لئے بیان سُنوں گا *جو سُنوں گا دوسروں تک پہنچانے کی کوشش کروں گا۔
صَلُّوْا عَلَی الْحَبِیْب! صَلَّی اللہُ عَلٰی مُحَمَّد
پیارے اسلامی بھائیو!ماہِ مُحرَمُ الحَرام ہمارے درمیان جاری و ساری ہے ،یہ مہینا ہر سال ہمیں شُہدائے کربلا کی اور بالخصوص نواسۂ مُصطفےٰ،سَیِّدُ الشُّہداء،اِمامِ عالی مقام حضرت امام حسین رَضِیَ اللہُ عَنْہُ کی یاد دِلاتا ہے، کیونکہ آج سے صدیوں پہلے اِکسٹھ(61) ہجری کو تاریخِ اسلام میں حق و باطل کے درمیان ایک عظیم معرِکہ پیش آیا،جسے واقعۂ کربلا کے نام سے یاد کیا جاتا ہے،اس معرِکے میں شُہَدائے کربلا رَضِیَ اللہُ عَنْہُم کے استقامت بھرے انداز نے تمام اہلِ حق کو باطل کے سامنے ڈَٹ جانے اور ضرورت پڑنے پر دینِ اسلام کی خاطر جان کا نذرانہ پیش کرنے کا عظیم ُ الشّان سبق دیا۔ اگر سُلطانِ کربلا،حضرت اِمامِ عالی مقام، اِمام حُسَیْن رَضِیَ اللہُ عَنْہُ چاہتے تو یزیدیوں کو تباہ وبرباد کر سکتے تھے مگر اِستِطاعَت اور قدرت کے باوجود خون کے پیاسوں پر بھی کرم نوازی فرمائی اورجنگ میں پہل نہ کی بلکہ آپ آخری وقت تک ان کو سمجھاتے رہے اور اللہ پاک کے عذاب سے ڈراتے رہے۔ میدانِ کربلا