شفیعِ اُمّت صلی اللہ عَلَیْہِ وَ آلِہٖ وَسَلَّم نے میری بات سُنی تو فرمایا : اِنَّا للہِ وَ اِنَّا اِلَیْہِ رَاجِعُوْن ، اے ابوہریرہ ! تُو خُود بھی ہلاک ہوا اور اس عورت کو بھی ہلاکت میں ڈالا ، کیا تمہیں اللہ پاک کا یہ فرمان یاد نہیں :

اِلَّا مَنْ تَابَ وَ اٰمَنَ وَ عَمِلَ عَمَلًا صَالِحًا فَاُولٰٓىٕكَ یُبَدِّلُ اللّٰهُ سَیِّاٰتِهِمْ حَسَنٰتٍؕ-وَ كَانَ اللّٰهُ غَفُوْرًا رَّحِیْمًا(۷۰)  

 (پارہ : 19 ، سورۂ فُرقان : 70)

ترجمہ کَنْزُ العرفان : مگر جو توبہ کرے اور ایمان لائے اور اچھا کام کرے تو ایسوں  کی برائیوں  کو اللہ نیکیوں  سے بدل دے گا اور اللہ  بخشنے والا مہربان ہے۔

حضرت ابوہریرہ رَضِیَ اللہ عنہ نے جب آیتِ کریمہ اور پیارے آقا ، مدینے والے مصطفےٰ  صلی اللہ عَلَیْہِ وَ آلِہٖ وَسَلَّم کا فرمانِ ذیشان سُنا تو آپ کو احساس ہوا  کہ میں نے غلط مسئلہ بتا دیا ہے ، آپ پر یہ احساس اتنا غالِب آیا کہ آپ مدینۂ مُنَوَّرہ کی گلیوں میں آواز لگانے لگے : ایک عورت نے رات مجھ سے مسئلہ پوچھا تھا ، کوئی بتا سکتا ہے کہ وہ عورت کون ہے ؟ آپ سارا دِن اسی طرح صدائیں لگاتے رہے ، یہاں تک کہ جب رات ہوئی تو وہ عَوْرت مجھے  کل والی جگہ پر کھڑی ملی ، میں نے اُسے پیارے آقا ، مدینے والے مصطفےٰ صلی اللہ عَلَیْہِ وَ آلِہٖ وَسَلَّم  کا فرمان سُنایا اور بتایا   کہ بے شک تمہارے لئے توبہ ہے (یعنی اللہ پاک بڑا غفَّار ہے ، تم توبہ کرو تو اللہ پاک قبول فرمائے گا)۔ یہ سُنتے ہی خاتون خُوش ہو گئی اور مارے خوشی کے اس نے کہا : میرا ایک باغ ہے ، میں اپنے گُنَاہ کے کفّارے میں وہ باغ راہِ خُدا میں صدقہ کرتی ہوں۔^([1])

دردِ دِل کر مجھے عطا یاربّ !                                                                                  دے مرے دَرد کی دَوا یاربّ !

لاج رکھ لے گنہگاروں کی                                                                                            نام رحمٰن ہے ترا یاربّ !