اللہ پاک سے جنگ کی۔^([1])  اور اللہ پاک سے جنگ کا نتیجہ کیا ہے؟ تباہی اور بربادی...!!

نفس و شیطان ہو گئے غالِب                                                                          ان کے چُنگل سے تُو چُھڑا یارَبّ!

نِیْم جاں کر دیا گُنَاہوں نے                                                                                      مرضِ عِصْیاں سے دے شفا یارَبّ! ^([2])

تَوْبہ اور استغفار کیا کیجئے!

پیارے اسلامی بھائیو! ہمیں چاہئے کہ ہم تَوْبہ اور اِسْتِغْفَار کریں، اللہ پاک سے اپنے گُنَاہوں کی مُعَافی مانگتے ہی رہا کریں۔ اللہ پاک فرماتا ہے:

وَ مَنْ یَّعْمَلْ سُوْٓءًا اَوْ یَظْلِمْ نَفْسَهٗ ثُمَّ یَسْتَغْفِرِ اللّٰهَ یَجِدِ اللّٰهَ غَفُوْرًا رَّحِیْمًا(۱۱۰) (پارہ:5،النساء:110) تَرْجَمَۂ کَنْزُالْعِرْفَان: اور جو کوئی بُرا کام کرے یا اپنی جان پر ظُلم  کرے پھر اللہ سے مغفرت طلب کرے تو اللہ کو بخشنے والا مہربان پائے گا

سُبْحٰنَ اللہ! معلوم ہوا؛ اگر بندہ بُرائی کر بیٹھے، گُنَاہ کر کے اپنی جان پر ظُلْم کر لے، اَب اُس کے وَبال سے بچنے کا طریقہ یہ ہے کہ بندہ فورًا سے پہلے تَوْبَہ کرے، اللہ پاک سے معافی کا طلب گار ہو، اگر بندہ ایسا کرے تو اللہ پاک کو بخشنے والا مہربان پائے گا۔

بہترین خطا کار

اللہ پاک کے آخری نبی، رسولِ ہاشمی  صلّی اللہ عَلَیْہِ وَ آلِہٖ وَسَلَّم  نے فرمایا:كُلُّ بَنِي آدَمَ خَطَّاءٌ وَخَيْرُ الْخَطَّائِيْنَ التَّوَّابُوْنَ یعنی ہر آدمی سے خَطا ہو جاتی ہے اور بہترین خطا کار وہ ہے جو تَوْبَہ کر لے۔ ^([3])