میرے ربّ کا کَلام ہے قُرآں                                                          واہ کیا بات پیارے قُرآں کی

مصطفےٰ پر ہوا ہے یہ نازِل                                                                                         اس میں ہر شے کا ہے بیاں شامل

سب سے افضل کتاب ہے قُرآں                                             واہ کیا بات پیارے قُرآں کی

قرآنِ کریم کی تاثیر

حضرت‌جُبَيْر ‌بن ‌مُطْعِم  رَضِیَ اللہُ عنہ صحابئ رسول ہیں۔ آپ نے فتح مکہ سے پہلے اِسلام قبول (Accept)کیا۔ مدینۂ مُنَوَّرہ میں رہتے تھے، وہیں وفات پائی۔^([1])

آپ  رَضِیَ اللہُ عنہ اپنے اِسلام قبول کرنے کا واقعہ بیان کرتےہوئے فرماتے ہیں: غزوۂ بَدْر میں جو غیر مُسلم قید ہو گئے تھے، میں (اَہْلِ مکہ کی طرف سے) اُن قیدیوں کے بارے میں بات چِیت کرنے کے لئے مدینۂ مُنَوَّرہ آیا۔ جب یہاں پہنچا تو یہ مغرب کا وقت تھا، پیارے آقا، مکی مَدَنی مُصطفےٰ  صَلَّی اللہُ عَلَیْہِ وَ آلِہٖ وَسَلَّم  مَغْرب کی نَماز پڑھا رہے تھے، آپ صَلَّی اللہ عَلَیْہِ وَ آلِہٖ وَسَلَّم کی آواز مبارَک مسجد سے باہر بھی سنائی دے رہی تھی،آپ نے سُورۂ طُوْرْ کی تِلاوت فرمائی، میں بھی قرآنِ کریم کی تِلاوت سُننے لگا (زبان مَحْبُوبِ خُدا کی تھی، کلام رَبِّ رحمٰن کا تھا، بس پِھر کیا تھا؛ ایسی پیاری آواز، اتنا پُرتاثِیر کلام میرے دِل میں اُترنا شروع ہوا)۔ اس دوران آپ  صَلَّی اللہُ عَلَیْہِ وَ آلِہٖ وَسَلَّم  نے یہ آیات پڑھیں:

اِنَّ عَذَابَ رَبِّكَ لَوَاقِعٌۙ(۷) مَّا لَهٗ مِنْ دَافِعٍۙ(۸) (پارہ:27، الطور:7 و 8)

تَرْجَمَۂ کَنْزُالْعِرْفَان:بیشک تیرے ربّ کا عذاب ضرور واقع ہونے والا ہے، اسے کوئی ٹالنے والا نہیں۔