قرآنِ کریم اور نکاح

               پیارے پیارے اسلامی بھائیو!رشتے کی تلاش اورمنگنی کے بعد اب نکاح و رُخصتی کا موقع آتاہے ، نکاح  نہ صرف نیک عمل بلکہ سُنَّتِ مُبارَکہ ہے ، قرآنِ کریم میں بھی ربِّ کریم نےنکاح کی ترغیب ارشاد فرمائی ہے ، چنانچہ

                             پارہ 4سورۃُالنسآء کی آیت نمبر3میں ارشاد ہوتاہے :

فَانْكِحُوْا  مَا  طَابَ  لَكُمْ  مِّنَ  النِّسَآءِ   (پ۴ ، النساء : ۳)                                                      

تر جَمۂ کنز العرفان : تو ان عورتوں سےنکاح کرو جوتمہیں پسند ہوں

                             اسی طرح کئی احادیثِ مبارَکہ میں بھی  نکاح کی نہ صرف ترغیب ہے بلکہ اس کے بے شمار فضائل وبرکات  بھی موجود ہیں ، آئیے! ترغیب کے لئےنکاح کی ترغیب و فضائل پر 5فرامینِ مصطفےٰسنتے ہیں ، چنانچہ  

نکاح کےفضائل

                             ارشادفرمایا : نکاح کر کے اَولادکی کثرت کرو کہ میں قیامت کے دن تمہارے سبب دوسری اُمّتوں پر فخر کروں گا ۔ ^([1])

                             ارشادفرمایا : تم میں سے جو نکاح کی طاقت رکھے وہ ضرور نکاح کرے کیونکہ نکاح  ، نگاہ کو جُھکانے والا اور شرم گاہ کا محافظ ہے اور جو نکاح کی طاقت نہ رکھتا ہو اُسے چاہئےکہ روزے رکھےکہ روزے اس کیلئے ڈھال ہیں۔ ^([2])