تم ٹھیک کہتے ہو مگر دُنیا میں سب سے عزیز چیز زِندگی ہے اور میں چاہتا ہوں کہ زِندگی کے جو بقیہ چند سانس ہیں اپنے بھائیوں کے لئے قُربان کر دُوں۔

خلیفہ نے جب یہ بات سُنی تو مُعامَلہ سمجھ گیا ، چُنانچہ قاضِی کو اِن بُزرگوں کے مُتعلق تحقیق کا حکم دیا ، آخِر اِن تینوں بُزرگوں کو باعزّت رہا کر دیا گیا۔ ^{( [1] )}

اے عاشقانِ رسول ! یہ ہے اِیثار... ! ہمیں بھی چاہئے کہ ہم ایک دُوسرے سے بڑھ کر قُربانیاں دینے کی عادَت بنائیں ! دُوسروں کو راحت پہنچانے کا ذہن بنائیں ، جب ہم اپنے مُسلمان بھائیوں کے ساتھ ایسے مخلص ہو جائیں گے ، اِن کی خاطِر قُربانیاں دینے کا ذہن بنا لیں گے تو اِنْ شَآءَ اللہ الْکَرِیْم ! ایک دُوسرے کی مَحبّت دِلوں میں بڑھے گی ، مَسائِل حَل ہوں گے اور اللہ پاک نے چاہا تو مُعَاشرہ امن و سکون کا گہوارہ بن جائے گا۔   

جذبۂ اِیثار دِل میں ہو اگر                    مسئلوں کا حل نکلتا جائے گا

صَلُّوْا عَلَی الْحَبیب !                                                صَلَّی اللہ عَلٰی مُحَمَّد

پیارے اسلامی بھائیو ! نیک لوگوں کی یہ چند مبارک عادات ہم نے سُنی ، ہمیں چاہئے کہ یہ عادات اپنائیں اور نیک لوگوں کو ہی اپنا آئیڈیل بھی بنائیں۔ صحابۂ کرام علیہمُ الرِّضْوان کی یہ مبارک تمنّا جس کا بیان ہم نے شروع میں سُنا کہ صحابۂ کرام علیہمُ الرِّضْوان نے کہا :

وَ نَطْمَعُ اَنْ یُّدْخِلَنَا رَبُّنَا مَعَ الْقَوْمِ الصّٰلِحِیْنَ(۸۴)   ( پارہ : 7 ، سورۂ مائدہ : 84 )

ترجمہ کَنْزُ العرفان : اور ہم طمع کرتے ہیں کہ ہمیں ہمارا رب نیک لوگوں کے ساتھ ( جنت میں )  داخل کر دے۔

کاش ! یہ تمنّا دِل میں بڑھانا نصیب ہو جائے۔اٰمِیْن بِجَاہِ  خَاتَمِ النَّبِیّٖن  صَلَّی اللہ عَلَیْہِ وَ آلِہٖ وَ سَلَّم ۔