آواز مبارَک کا معجزہ

یہاں 2 باتیں سیکھنے کی ہیں؛ (1):پہلے نمبر پر تو پیارے آقا  صَلَّی اللہُ عَلَیْہِ وَ آلِہٖ وَسَلَّم  کی آواز مبارَک کا معجزہ دیکھئے! جہاں مسجِدِ جمعہ ہے، اس کے قریب قبیلہ بنو غَنَم ہوتا تھا، مسجدِ نبوی شریف سے یہ فاصلہ تقریباً 3 کلومیٹر کا ہے۔ پیارے آقا  صَلَّی اللہُ عَلَیْہِ وَ آلِہٖ وَسَلَّم  نے مسجدِ نبوی شریف میں فرمایا: اِجْلِسُوْا بیٹھ جاؤ! کوئی سپیکر(Speaker) نہیں ہے، کوئی مائک نہیں ہے، کوئی ساؤنڈ سسٹم(Sound System) نہیں ہے، اِس کے باوُجود آواز مبارَک مسجد نبوی شریف سے 3 کلومیٹر تک صاف سُنائی دے رہی ہے۔ مَدّاحِ حبیب، مولانا جمیلِ رضوی  رحمۃُ اللہِ علیہ  لکھتے ہیں نا؛

دُور نے، نزدیک نے آواز یکساں ہی سُنی

جب         ہوئے         بالائے         مِنبر         رَحْمَۃٌ         لِّلْعَالَمِیْں^([1])

اللہ پاک ہمیں بھی یہ مُقَدَّس، مبارَک، پیاری پیاری، دِل میں اُترنے والی، سینے میں ٹھنڈک اُتارنے والی آواز سُننا نصیب فرمائے۔ سُنیں گے اِنْ شَآءَ اللہُ الْکَرِیْم! کب سُنیں گے...؟ اعلیٰ حضرت  رحمۃُ اللہِ علیہ  لکھتے ہیں:

پائے کُوْبَاں پُل سے گزریں گے تِری آواز پر

رَبِّ      سَلِّم       کی       صَدا       پر       وَجْد       لاتے       جائیں       گے^([2])

وضاحت: قیامت کے دِن یہ آواز سُنیں گے، بال سے باریک، تلوار سے تیز ، اندھیرے میں ڈُوبے ہوئے پُل صراط سے گزرتے ہوئے سُنیں گے، مَحْبوب  صَلَّی اللہُ عَلَیْہِ وَ آلِہٖ وَسَلَّم  رَبِّ سَلِّمْ، رَبِّ سَلِّمْ